E ruleta Ruso di Vladimir Putin

The content originally appeared on: Diario

Siman ta cera cu e temor y menasa di un explosion mundial — *Mundo comunista por sobrebibi sin e mundo di consumo priva? — * Uno di e momentonan mas peligroso den man di hende sin salida

ORANJESTAD (AAN)- E prome fin di siman di Maart 2022 a hiba mundo na uno di e situacionnan cu for di momento cu e prome bom atomico a wordo detona, hende a evita.

Na momento cu e dos bomnan atomico a resona na Hiroshoma y Nagasaki pa marca fin di Segunda Guera Mundial,  hende a trata di produci mas y mihor arma cu na final a bira un menasa pa hende mes.

E poder destructivo di armanan nuclear a bira asina grandi, cu continuamente mundo mester a reuni pa mira con e ta yega na eliminacion di e menasa di destruccion di mundo manera nos conoce actualmente.

Awe mundo a alcansa e punto cu tanto el a evita di conoce. Por cierto, tension a crece den e ultimo dos dianan debi na e atakenan di Putin riba centronan energia nuclear na Ukraine cu tur resultado cu nan por tabata tin.

Di e forma aki directamente Putin a duna confirmacion na mundo cu e no hala atras pa uzo di arma nuclear.

Ayeranochi tabata evidente cu mundo a alcansa e Ora Cero, na momento cu tabata conoci cu Putin na Rusia mes a cuminsa tuma medida pa evita cu su poder ta na peliger.

Na Rusia, na su propio pais, Putin a prohibi e comunicacion di Pueblo di Rusia cu otro partinan di mundo pa medio di entre otro Facebook y asina a implementa e ultimo parti di su isolacion di Pueblo di Rusia cu ta depende di Putin pa ricibi informacion riba e realidad mundial.

Mientrastantoi Putin a sigui avansa y mundo a conoce e momento cu el a evita tanto tempo y cu ta pone tropanan Ruso dilanti tropanan Mericano.

Kico lo socede?

Putin tin sosten di paisnan comunista y paisnan subversivo. Pero e sosten aki por carga Rusia den e ofensivo contra mundol henter?

Putin lo sconde tras di e destruccion di mundo pa e evita cu e ta perde su poder na Rusia?

Putin a pone tur cos na wega. E no por hala atras mas.

Mundo porfin ta completamente pendiente di Putin cu a hunga ruleta Ruso cu su mes.

Putin a pone un arma na su cabez. Un revolver cu un cantidad di bala y e ta duna indicacion cu e ta laga e arma dispara.

E lider di Rusia a wordo forsa dor di e situacion cu e mes a crea, pa asumi e posicion mas importante cu e por a asumi den e conflicto cu el a crea ora el a invadi Ukraine.

Fin di Mundo, Inicio di Tercer Guera Mundial. Algun di e opinionnan cu a wordo lansa ayera pa hende na mundo cu Putin a pusha lomba contra muraya mientras cu destruccion di enemigonan, lo bira destruccion di Vladimir Putin, cu a duna prueba cu e no tabata prepara pa e strategia di un  guera cu el a cuminsa pero no sa con maneha pa e alcansa.

Un ruleta Ruso den cual forsa di comunismo versus mundo liber  mester wordo midi.