E resultado di falta di producto pa comercio

The content originally appeared on: Diario

90 Porciento di comercio internacional ta depende di barco  —  *Kico lo ta e resultado di un crisis comercial pa comunidad? — *Articulonan na benta ta base di e concepto di comercio

ORANJESTAD(AAN)- For di inicio di e pandemia Covid-19, mundo ta papia di e falta di producto cu ta falta di articulonan cu comercio ta pone na benta pa wordo cumpra dor di publico.

   Si nos analisa informacionnan cu ta sigui drenta rond mundo y nos papia cu publico na Aruba y otro parti di mundo, nos ta comprende cu e falta di articulo pa pone na benta lo sigui aumenta.

  Awe e momento a yega sigur pa papia di e situacion mundial y e problema serio di falta di producto pa bende.

   Origen di comercio ta den benta di producto. Comercio ta existi a base di e intercambio di servicio y producto di un hende pa otro.

   E ta un cadena. E panadero ta traha pan, cu e trahador den mundo di construccion ta cumpra pa asina e panadero haya placa pa construi su cas.

   Economia ta e totalidad di actitividad cu ta produci placa pa tur miembro di un comunidad y e comunidad mes pa medio di belasting.

   Si no tin producto kico ta pasa? Kico ta wordo ofrece na Pueblo y con comunidad lo sigui?

   Hende a inventa chip. Siman pasa a wordo anuncia atrobe cu e problema no a conoce solucion. Scarcedad di chip ta continua.

   Esaki ta su turno ta haci cu produccion di auto ta tranca loke ta haci cu tin menos auto pa bende.

   Menos auto pa bende ta afecta negoshinan cu ta huur auto cu turista pero tambe tur hende cu mester di auto como transporte pa nan por traha.

Ya no ta posibel pa skirbi cu tin scarcedad y cu publico a nota cu e articulo cu nan tabata uza den nan cushina, no ta presente mas.

Scarcedad, scarcedad y mas scarcedad. Kico esaki ta nifica pa economia y prijsnan cu mester spera?

Scarcedad ta uno di e motibonan cu prijs ta subi. Menos articulo disponibel pa benta, mas halto e prijs.

Ora nos papia di un articulo exclusivo, nos sa cu e ta costa placa pasobra ta pasobra e ta exclusivo, e tin un prijs halto.

Kico mester spera? Un mama cu yiu chikito ta den problema pasobra cierto marca di producto di cuminda pa baby tambe conoce scarcedad. E mester di informacion.

Comercio mundial ta den un problema for di momento  cu Covid-19 a bati na porta y comerciantenan cu a dedica nan bida na nan negoshi, nan entrada, a haya nan mes den problema.

DIARIO tambe ta un empresa y den e circulo di comercio mundial nos tambe mester tene cuenta cu loke ta afecta comercio mundial.

Con serio e situacion ta? Cuanto carga local ta pega riba barco y cuanto compania ainda ta wordo afecta na nan pais dor di Covid-19?

Con e situacion na Ukraine ta afecta Aruba tambe?

Aruba a conoce dos algun siman marca pa dianan di fiesta. Awor Aruba mester uni pa hunto sigui cana.

E situacion mundial ta serio y ta afecta Aruba tambe.

Hunto mester atende e situacion local di cantidad di sector, pero tur parti di un mundo cu ta den problema serio.

Na hopi occasion nos a trece dilanti cu Aruba como isla chikito ta den un situacion mas vulnerabel cu un pais grandi.

Nos tira un bista riba e isla di Nueva Zeelandia, un isla grandi, nos ta mira cu e tambe tabata den isolacion y cu e tambe tabata tin su portanan cera loke a afecta su turismo.

Sinembaego, e tin produccion propio cu e por controla.

Mundo ta den un crisis sumamente serio. Aruba como parti di mundo tambe ta den un crisis sumamente serio, cu mester di loke a haci posibel pa Aruba por a enfrenta tur crisis den su historia y por a logra su Status Aparte.

Arubianismo, e sentido patriotico di e Arubiano, ta e factor di logro di Aruba, cu awe mester haci, cu abiertamente por papia cu otro, atende un realidad mundial cu otro pa como pais, Aruba Dushi Tera por enfrenta y atende e situacion mundial cu no ta Aruba a crea pero ta afecta Aruba, manera organisacionnan mundial a adverti.