E problemanan regional cu ta afecta Aruba den tempo dificil

The content originally appeared on: Diario

Prome Ministro Wever-Croes a presenta e reto grandi scondi den 2022 —  Caida social economico den region di Aruba ta un peliger grandi —Historia di Aruba ta confirma peligernan cu lama ta trece costa

ORANJESTAD (AAN) – Cifranan mundial ta papia un palabra cla. Paisnan mester prepara nan mes pa por sigui cana den un situacion mundial, cu peligernan sumamente grandi pa e calidad y nivel di bida na paisnan.

Uno di e informacionnan cu a keda presenta e dianan aki dor di Prome Ministro Wever-Croes ta papia di un combersacion cu el a sostene cu e Ministro di Asuntonan di Exterior di Trinidad y Tobago.

Manera Prome Ministro Wever-Croes a trece dilanti, den e reunion virtual a papia di e resultadonan cu desaroyonan den e region, pues na paisnan manera Venezuela, tabata tin pa Aruba.

Di e forma aki, un pakete importante di e exigencianan pa gobernacion na Aruba, a bini dilanti.

Ora papia di gobernacion di un pais, ta papia di e tareanan diario di gobernantenan pa duna direccion na un pais. Gobernacion ta exigi tambe preparacion pa loke por bati na porta di forma inespera pa diferente motibo.

Covid-19 a entrega Aruba e prueba grandi di sucesonan cu no por mira adelanta y ta bira reto grandi pa atende como emergencia.

Calamidad pero di otro banda tambe posibilidadnan positivo cu por bati na porta, ta dicidi pa gobernacion cu, sinembargo, tambe mester tene cuenta cu asuntonan cu lama ta trece costa di Aruba.

Historia moderno di Aruba ta entrega motibonan, cu como pais chikito, Aruba mester ta prepara pa resultado di desastre na paisnan grandi den su region.

E sistema gubernamental di Aruba a evita cu Aruba a conoce situacionnan di por ehempel revolucionnan y situacionnan politico extremo cu ta afecta un pais.

E nivel di bida di Aruba ta destaca den un region, cu pa un parti grandi no a conoce e desaroyo y e nivel di bida cu Aruba a conoce.

Aruba pues mester prepara su mes, pa por enfrenta situacionnan cu ta nace di problemanan politico di otro pais den region, cu resultadonan directo pa Aruba.

Den e situacion mundial cu ta desaroya den cuadro di e Guera di Ukraine cu resultadonan pa entre otro mundo di petroleo y comercio internacional, Aruba mester tene na consideracion, cu Aruba ta rondona pa paisnan cu tin problema mucho mas grandi pa sobrevivi desaroyonan social y economico na caminda.

Prijsnan ta sigui subi. Pobresa lo ta manera fli den biento di Cuaresma na hopi pais den region di Aruba.

Hopi pais den region di Aruba no conoce leynan social cu Aruba conoce.

Caida di entrada personal, aumento di hamber y problema personal y social, ta riba e lista di emergencia di hopi pais den region di Aruba.

Kico esaki lo nifica pa Aruba? Cuanto hende den region di Aruba, ta capaz pa mantene nan cabez riba awa y cuanto lo trata pa alcansa mas siguridad cu Aruba ta ofrece?

E tema cu Prome Ministro Wever-Croes a aborda den su combersacion cu e Ministro di Trininidad y Toboga, ta uno di e topiconan mas importante di momento na un mundo yen di inseguridad pa futuro, grandemente desconoci pero cu lo ta parti di gobernacion, cu mester ta prepara pa atende cu desaroyonan na cas pero tambe pafor di Aruba cu resultado pa Aruba.