E papel real di Nacionnan Uni den guera, hamber y abuso humano

The content originally appeared on: Diario

Hende tin miedo di mishi cu e instancia cu mester deshaci di miedo — * Cuanto placa mundo ta gasta pa persigui e soño di paz, dignidad y igualdad? — * Placa pa mata hamber ta sostene plataforma pa dictadornan bira cabayero

ORANJESTAD(AAN)- Cu hende ta dedica un parti importante di su bida na fantasia, sigur a wordo confirma cu introduccion di e organisacion mundial, Nacionnan Uni.

Generalmente ora hende bay soño, e ta bolbe na realidad cu ta splica cu fantasia ta e problema mas grandi di hende.

Si tin un instituto na mundo cu ta mustra dede riba berdad di hende, e yama Nacionnan Uni, cu a wordo inventa despues cu hende a destrui mundo, a mata miyones y miyones di inocente na un forma cu hasta animal salvahe a sali na careda.

Na 1945 mundo mester a clausura uno di e epocanan mas horibel cu historia por a produci. Sinembargo, mundo tabata na haltura cu el a laga un porta mucho mas grandi habri pa matansa cu bomnan cu lo a surpasa e forsa di bom atomico, pa destruccion di hende cu arma biologico y abuso di e ser humano cu solamente e “homo sapiens” cu a siña cana riba dos pia, por a inventa.

Dia 24 di October 1945, paisnan grandi a dicidi cu Segundo Guera Mundial ta termina y a funda e organisacion cu mester a percura pa Paz, Dignidad y Igualdad di hende. Bravo!

Nacionnan Uni a bira un hecho y un centro di circulacion di placa, cu normalmente no ta bini dilanti den discusionnan cu ta alcansa e mundo di hende humilde, cu mester aplaudi loke ta yama nan mes lidernan mundial.

For di momento cu Nacionnan Uni a mira luz, no tabata tin un momento di paz na mundo aunke tur pais tabata contribui pa e oficinanan y representacionnan rond mundo, cu ta produci mas morto den guera cu mayoria di virus.

Kende ta habri boca ora Nacionnan Uni bini hunto y lansa e pregunta unda hipocrecia a keda?

Awe mundo ta rementa den un situacion d horor. Hamber ta podera di un parti grandi di poblacion di mundo, mientras Biyones y Biyones ta wordo hinca den material di guera, cu ningun hende ta discuti ora Nacionnan Uni ta realidad y e lidernan cu ta dirigi ehercito contra otro, topa otro den e organisacion cu awe mester tabata capaz pa pone fin na guera di Ukraine, pa pone fin na abuso contra hende rond mundo dor di dictadornan, cu a mata democracia pero tin asiento den Nacionnan Uni pasobra ta nan ta dicidi pa nan pais.

Placa cu cual paisnan mester contribui na Nacionnan Uni pa tanto asunto cu Nacionnan Uni mester resolve pero aparentemente solamente por empeora, no ta alcansa hendenan cu ta sufri di hamber den e cadena di guera y abuso di ser humano.

Placa di contribucion na ehercitonan di paz, mester por a crea un mundo nobo di paz y trankilidad, cu, sinembargo, no por bira realidad, pasobra e no ta duna cantidad di despotanan cu ta mata, destrui hende, pa nan bira poderoso.

Mundo ta pasa den uno di su pio momentonan.

Na 2015 Nacionnan Uni a introduci un plan pa na 2030 pone fin na miseria. Awe miseria humano material y no material, ta logro di dirigentenan mundial, cu ta trapa riba e derecho di hende pa ta hende.

Kico lo pasa na un mundo di horor humano? E bom nuclear mester pone fin na loke a resta di hende?

Burico ta bay sconde den mondi pa no wordo confundi cu hende, cu poco poco a perde su alma den e ansha di ta poderoso.

Hende ta destrui su mes.

Na 1945 a pone fin na Segundo Guera Mundial. Nacionnan Uni a bira realidad den un guera friu, marca pa hipocrecia di supuesto lidernan cu ta dirigi sumanan enorme di contribucion di paisnan, pa nan tin edificionan como plataforma pa nan crece mientras un grupo cada dia mas grandi, ta muri di hamber y miseria rond mundo, cu ta aplaudi dictador y destructor barata!