E impacto di salida di Reina Elizabeth riba region di Caribe

The content originally appeared on: Diario

Kico lo pasa si cantidad di pais chikito bandona Mancomunidad Ingles?

*Un analisis di realidad di un mundo di expansion scondi y peligroso 

ORANJESTAD (AAN) — Uno di e sucesonan di mas impacto mundial durante e ultimo dianan, tabata e despedida di Reina Elizabeth II di Inglatera.

Mientras filanan largo ta tuma despedida di un Reina cu a inspira un mundo na momentonan dificil, pa 56 pais na mundo e suceso lo nifica cu nan a perde e Reina cu ta simbolisa e union den Mancomunidad Ingles.

E palabra “Mancomunidad” a resona na Aruba, na momento cu Aruba tabata na caminda pa su Status Aparte y tabata busca formulanan estatal como alternativa pa un relacion basa riba Statuut.

Awe na henter mundo atencion ta wordo presta na e nificacion di “mancomunidad” cu ta directamente mara na relacionnan estatal pa Gran Bretaña.

Kico e salida di Reina Elizabeth II por nifica pa e region di Caribe, ta nos pregunta grandi pero tambe di henter e continente America, cu tin 13 pais cu ta parti di e Mancomunidad Britanico.

Den e region di Caribe, un gran parti di e islanan, ta parti di e Commonwealth Britanico, loke ta duna e salida di Reina Elizabeth II un nificacio special pa Aruba tambe.

Kico lo ta e resultado pa paisnan cu ta keda imediatamente den nos region? Un pregunta cu sigur nos mester haci nos mes si nos tuma na consideracion tur e desaroyonan cu ta tuma lugar riba tereno politico den nos cercania directo.

Mas y mas por nota, con na forma scondi, cierto tendencianan politico ta presenta.

Kico lo socede den porta di Aruba? Kico ta e desaroyonan cu por spera den nos region? Kico lo pasa si islanan chikito den Caribe, cu ta parti di e Common Wealth, inspira pa tendencianan cu por ta hasta peligroso pa nos stabilidad, dicidi cu nan no ta atende mas cu e Mancomunidad Britanico?

Pa comprende loke por pasa, mester tene na prome lugar consideracion cu loke nan presencia den e Mancomunidad ta nifica.

Participacion na e Mancomunidad ta nifica asistencia di e participantenan na estadonan mas chikito y den desaroyo cu por ricibi yudansa economico. Tambe nan ta haya asistencia den otro asuntonan clave pa nan presente y futuro.

Cu tur e paisnan cu tabata miembro di e Mancomunidad Ingles no ta contento, ta algo cu ta bini dilanti durante ultimo temponan.

Pero kico lo pasa si nan bay?

Na e momentonan aki, Aruba ta conoci cu e paisnan cu ta poderoso den e Mancomunidad manera Inglatera, India, Canada y islanan mas grandi den Caribe manera Trinidad y Tobago.

Kico lo pasa si na e islanan mas chikito, gobernacionnan mara na dictaduranan scondi y peligroso, haya oportunidad di trece cambio? Kico esaki lo nifica pa Aruba?

Nos ta tira un bista na Venezuela, cu awor ta forma un lazo cu Colombia, cu a cay den man di un Comunista na un momento cu tras di conflicto mundial na Ukraine, tin e origen di expansion Comunista di maximo dirigente Putin.

Reina Elizabeth II a un hunga un papel sumamente importante pa loke ta trata e lazonan den e Mancomunidad Britanico.

Awor kico?

Un pregunta cu tempo lo mester contesta. Un asunto cu henter mundo ta discuti ora tuma nota di e realidad di e Mancomunidad cu ta consisti di 56 pais independiente cu ta miembro di un Union cu a perde su lider.