E humiliacion di Aruba di Mike Eman ta cumpli 10 aña!

The content originally appeared on: Diario

Realidad politico di Aruba na caminda pa eleccion 2025 ta confirma

*Politica a bisti un disfraz barata na 2014 cu welga di hamber

*Suelo sagrado di Aruba a bira modelo di corupcion den historia 

ORANJESTAD(AAN)—Aruba a drenta e ultimo etapa di Carnaval 70 cu un culminacion di actividadnan pa ciudadanonan y bishitantenan di un Pueblo cu tambe por celebra  na 2024, e restoracion di e dignidad gubernamental di Aruba.

Na Juli 2024, Aruba lo recorda cu ta exactamente diez aña pasa, cu e pais a wordo humilia na e forma mas horibel cu historia ta presenta na generacionnan di awe y futuro.

Mike Eman a haci bofon di e Pueblo Arubano y a uza e herment sagrado di gobernacion di e pais y confianza di e Pueblo, pa hunga e wega politico mas barata, mas doloroso y mas destructor, cu cualkier fayo di gobierno por produci.

Con un hende, pues sigur un gobernante, cu ta respeta su mes, por a baha honor di e sistema democratico te na suela, ta keda confirma awe y den henter historia di Aruba ora analisa kico un homber cu un estudio universitario (pues mester tabata sabi mihor) a haci cu alma di un Pueblo.

Un Prome Ministro, ta e dirigente cu e Voz di Pueblo reuni den Parlamento despues di eleccion, ta entrega e tarea pa na e forma mas eleva y digno posibel, ocupa su mes cu maneho diario di e pais.

Esaki ta nifica, cu ta na e nivel di mas halto manera a pasa ora Aruba a haci uzo di areglonan di Nacionnan Uni pa su autodeterminacion bou Betico Croes, ta busca e solucion di problemanan y ta crea respet den Reino pa e pais.

E berguenza di mas grandi cu Aruba por conoce den su historia tabata e comedia sin gusto di Mike Eman den Fort Zoutman despues cu el a destrui e base financiero di Aruba y Reino cu razon a interveni pa scapa e Florin Arubano, aunke Reino tambe a faya cu Aruba cu e tardansa pa actua.

Awe Reino por blackmail Aruba cu un taza di interes pero hamas e por haci cu  Aruba awe manera el a haci na 2014, ora Mike Eman a destrui e respet cu Aruba merece dor di habri porta pa Reino drenta y dicidi na bienestar di e mayoria di habitantenan di Aruba, con e maneho financiero mester ta.

E engaño politico di mas grandi cu historia di Aruba a conoce, ta e momento cu Mike Eman a pone e cherry riba e bolo di su abuso contra Aruba, y a drenta un supuesto welga di hamber cu ta un berguensa.

Un batayon di profesional pa evita cu Mike lo a muri pasobra el a keda algun dia sin come mientras rond mundo tin hende cu pa motibo inhumano, ta keda simannan largo sin come.

Un aparato costoso di cuido medico mester a evita Mike Eman di muri e morto cu e mes kier a muri, mientras Florin Arubano tabata enfrenta morto mescos cu e bienestar di Aruba.

Na 2024, Aruba ta prepara atrobe pa eleccion den un estado di recuperacion economico y financiero pero tambe cu e peso di herencia di debe crea pa Mike Eman riba su lomba.

Awe personanan cu a wordo considera posibel heredero di liderazgo di AVP, a bandona e partido y ta den Parlamento di Aruba, cu tambe conoce e adorno di presencia di e politico Benny Sevinger, cu tabata e sombra di Mike Eman ora Hulanda a bini na 2024 pa declara Aruba bancarota y terenonan di Aruba tabata bay pa Family and Friends cu por a paga mientras e Pueblo sin entrada, pero cu mester a bira mayoria di voto di Mike, a keda sin tereno.

2024 ta marca e segun lustro di un gobernacion cu a destrui Aruba financieramente y economicamente pa no papia mes di e abuso cu a wordo haci cu e Arubiano sin entrada.

Gobierno Mike Eman mester a ofrece su disculpa na Pueblo di Aruba, cu pa no mira realidad di loke Gobierno Eman a haci cu Aruba, a trece Nicolas Maduro y su baca di lechi Citgo, cu a bira motibo pa Arubianonan keriendo den otro fantasia di Mike Eman, a hinca nan curpa den debe cu awe nan mester paga sin e placa cu Mike Eman a priminti cu lo a cubri tur parti di Aruba.

Aruba ta recorda na 2024, e segundo lustro di e berguenza politico mas grandi cu el a conoce, cu ta e disfraz di welga di hamber di Mike Eman, cu a haci bofon di un Pueblo pa e por a destrui futuro di Aruba, cu awe milagrosamente a wordo rescata y tin un base pa sigui cana den futuro!