E grado di Hueznan Arubiano ta esun di mas halto di tur e otro Cortenan di Curacao y Sint Maarten

The content originally appeared on: Diario

Presidente di Corte Comun di Husticia, Huez Maurits de Kort

ORANJESTAD (AAN) — Den un entrevista cu DIARIO, Huez Maurits de Kort, Presidente di Corte Comun di Husticia, e elabora tocante e proceso unda Aruba a haya cinco Huez nobo, cu ta mas cu den e otro Islanan di Caribe Hulandes.

            El a splica cu e 40 hueznan cu Corte Comun di Husticia tin en total, a sirbi tur e seis islanan di loke antes tabata Antiyas Hulandes. Pero awendia tin Aruba, Curacao, Sint Maarten como paisnan autonomo y e tres islanan BES cu ta cay bao di Hulanda.

            “Como Corte Comun di Husticia nos ta un entidad autonomo a base di cual nos por sirbi husticia na tur e Islanan aki. E 40 hueznan cu nos tin, tin nan hurisdiccion riba tur seis isla. Kiermen, riba tur seis isla nan tin autoridad. Pero bo tin cu reparti e riba e diferente islanan unda nan ta biba y haci nan trabao, anto aki na Aruba nos tin tanto hueznan local como hueznan di Hulanda, cu ta bin pa 3 of 5 aña. Anto awo bo tin e mezcla caminda dos yiu di tera ta bin bek (dos huez local) y tres huez cu ta bin bek di Hulanda y nan ta bay keda 3 cu 5 aña den Corte di Prome Instancia, aki na Aruba”, Presidente di Corte Comun, Huez Maurits de Kort a splica.

            El a agrega cu esaki ta nifica pa Aruba cu e grado di Hueznan Arubiano ta esun di mas halto di tur e otro Cortenan di Curacao y Sint Maarten.

            Por bisa cu e maneho di hof den Caribe Hulandes ta esun di mas exitoso aki, na Aruba. El a sigui splica cu tur aña, despues di e recess di verano, ta wak si den e diferente oficinanan di Corte riba e islanan, tin hueznan nobo ta bin.

            Por ehemplo, Aruba e luna aki tabata prome, otro siman ta Sint Maarten pasobra eynan tin un huez nobo y un huez cu a wordo traspasa di Curacao pa Sint Maarten; despues Curacao ta na beurt dia 7 di October, unda tin tres hueznan nobo cu a bin di Hulanda, despues tin un huez nobo di Hulanda ta bin traha na Bonaire.

            “Otro aña nos lo mira atrobe na unda e vacaturanan lo habri caminda hueznan nobo lo bin of cu lo tin traslado atrobe di un oficina di Corte pa otro”, Huez Maurits de Kort, Presidente di Corte Comun di Husticia a señala.