E futuro di Aruba tabata den man di Mike, Nicolas y Putin!

The content originally appeared on: Diario

Analisis di loke por a pasa si na 2017 Aruba no a conoce cambio

ORANJESTAD(AAN)—Awe na un momento cu henter mundo ta busca forma pa sigui dilanti den un guera cu ta bira cada minut mas mundial, aparentemente Mike Eman a ventila su opinion riba medidanan cu Gobierno Evelyn Wever-Croes a tuma.

Un asunto cu naturalmente por resulta den algun voto pa Mike Eman, cu a duna prueba cu den e situacion mundial actual, mihor ningun pais uza su persona como general pasobra nan ta perde guera.

Kico lo a pasa cu Aruba awe, si na 2017 e pais no a dicidi pa cambio?

Naturalmente Hulanda lo a exigi pa Gobierno Mike Eman pa tuma tur e medidanan cu awe nan ta exigi Gobierno Wever-Croes pa tuma.

Realmente for di 2014 Hulanda ya a impone cambio den e forma cu ta maneha placa di Aruba y supervision a cuminsa.

Loke a evita Aruba mira cu e tabata den problema serio tabata, cu a priminti Aruba cu Citgo ta haci su entrada.

Ta bon cu hende no por mira nan futuro.

Si na 2016 Aruba tabata por a mira kico 2022 lo a trece, Aruba sigur lo no a baila pa apertura di e refineria pero lo a cuminsa cera su frontera pa Nicolas Maduro no presenta na costa den compania di Putin.

Si e plannan pa trece Citgo Aruba a sigui, awe Mike Eman, Nicolas Maduro y Vladimir Putin lo por ta dal um betro na Aruba.

Awe no tin momento mas pa politica na un mundo, cu conoce horor y mas horor y e instabilidad enorme cu solamente un guera internacional, por produci.

Ta bon pa Mike Eman comprende, cu ta un guera nuclear ta e arma cu cual Putin ta menasa.

Kico lo a pasa cu Aruba, of loke a resta di Aruba, si na 2017 no tabata tin cambio politico?

E debenan cu Mike Eman a laga atras riba tur tereno, lo a conduci na medidanan di Hulanda. E pakete cu Evelyn Wever-Croes mester a introduci na 2018, lo mester a wordo introduci dor di cualkier partido.

Esaki no ta nada desconoci pa Mike Eman, si el a tuma nota di tur e rapportnan di IMF y tur otro instancia oficial, cu el a tene den lachi pa Pueblo si e mes a yega di lesa nan.

DIARIO ta papia cu prueba den man.

Mike Eman a cay den trampa di Nicolas Maduro, manera henter mundo a adverti, pasobra Mike Eman no tabata tin otro salida debi na e situacion cu Aruba tabata aden for di 2011, cu Aruba a keda coho.

Aruba mester di trankilidad na e momentonan aki, cu ningun pais tin seguridad kico lo pasa dentro di un hora.

Cu medida mester wordo tuma, ta un hecho na Aruba, na henter mundo cu ta na careda cu prijs di petroleo, un Omicron cu ta afecta awor Asia y cantidad di pais ainda pa no papia di e peliger cu Putin a produci.

E futuro cu Mike Eman kier a ofrece Aruba tabata basa riba promesanan di Nicolas Maduro, rehen di Vladimir Putin. Riba fantasia y mas fantasia pa cual awe Aruba mester paga bou cualkier gobernacion di cualkier partido cu tuma asiento den e oficina di Gobierno di Aruba.