E fu ni fa di Aquanette Gunn

The content originally appeared on: Diario

Den un crisis mundial no tin espacio pa politica barata — *Prome cu politico lanta buelo e mester conoce motor di avion — *Kende kier sinta riba e stul di Prome Ministro den situacion actual?

ORANJESTAD(AAN)—E situacion cu henter mundo conoce actualmente, ta exigi pa personanan cu kier lansa nan mes como politico, sa sikiera di kico nan ta papia.
Kico ta nifica politica barata a bini dilanti den persona di Aquanette Gunn, cu a dicidi cu e kier lanta un buelo politico, pero a lubida cu pa avion bula, e mester tin un plan di buelo.

Ta sumamente tristo cu den e situacion actual, Aquanette Gunn kier uza prijs di gasolin cu ta un  problema pa henter mundo, pa e recorda Aruba cu el a subi lista politico durante ultimo eleccionnan.

Na e momentonan aki Pueblo di Aruba mescos cu poblacion di tur otro pais na mundo, no mester di hende cu kier hunga profesor pa nan por haya voto, pero mester di hende cu di berdad ta sinti loke e Pueblo ta sinti y no ta hunga Annie Oakley den un clima tropical.

Aquanette Gunn a acusa Gobierno di no ta haci ni “fu” ni “fa” den asunto di prijs di gasolin, cu aparentemente ta un asunto cu Gunn mes tin basta problema pa comprende.

Prome cu Aquanette a haya oportunidad di lanta su buelo ayera, e ala di su avionnan a cay hunto cu prijs di petroleo na un mundo, cu tin miedo di e resultadonan cu prijsnan halto lo nifica finalmente pa e totalidad di comercio mundial.

Politica ta haya un sabor amargo cu e “fu” y “fa” di politiconan di nivel di Aquanette Gunn, cu kier uza uno di e problemanan mas serio di comunidad como un arma contra su contrincantenan politico.

Awor kico Aquanette mes kier haci? Aquanette Gunn kier bay reuni cu Rusia pa mira si e por pone un punto final na e problemanan cu ta rementa rond mundo? Aquanette Gunn kier bay dicidi pa mundo di petroleo kico prijsnan mester bira?

Nos kier lansa un pregunta serio na e grupo di politiconan cu e “visionnan” di Aquanette Gunn.

Na e momentonan aki, kende lo kier ta den posicion di lider na ningun pais? Laga nos tur ta franco cu otro.

Nos sigur lo no kier ta sinta riba stul di ningun Prome Ministro na ningun pais democratico pasobra tur loke nos ta mira rond mundo ta, con dirigentenan politico honesto ta kibra nan cabez pa haya solucionnan pa situacionnan, cu no ta den nan man.

Na e momentonan aki Aruba ni ningun pais democratico na mundo mester di politiconan di “fu” ni “fa” manera Aquanette Gunn, cu a lansa un disparo pa duna prueba cu e no sa kico ta “fu” ni “fa” den e problemanan mundial actual, cu ta poco mas complica cu hunga politica barata pa kere cu Pueblo lo cay den trampa di hende cu kier lanta buelo pa haya voto, pero no sa mes con motor di nan avion ta funciona.

Aruba y henter mundo mester di lider capaz y capacidad ta cuminsa cu seriedad, cu sigur no tin espacio pa e “fu” ni “fa” di Aquanette cu a duna tur prueba cu e no sa mes di kico e ta papia!