E credibilidad di un Prome Ministro den caos internacional

The content originally appeared on: Diario

Instancianan internacional ta prepara mundo pa epoca di reforma — *Tono diferente den relacion cu Reino ta inclui solucion pa 12.6% — *Entrada di Eagle na e momento cu energia ta bira punto critico

ORANJESTAD(AAN)—Ora un instancia oficial internacional kier analisa y expone realidad di un pais, su atencion ta dirigi na prome lugar riba gobernacion di e pais y e lider ehecutivo nacional.

Na 2017, mr. Evelyn Wever-Croes a haci su entrada como Prome Ministro di Aruba cu segun Reino Hulandes mester a conoce reforma pa asina segura futuro financiero, economico y social.

Reforma ta loke Hulanda a exigi for di 2014 ora Aruba a perde su autonomia financiero.

Reforma ta loke Reino a sigui exigi na momento di cambio di Gobierno na 2017 ora  Aruba mester a drenta un etapa nobo den cual mester a recupera autonomia y salud economico, financiero y social di e pais.

E prome reforma grandi cu Aruba a conoce na 2018, tabata aumenta su entrada pa  e por a  bira suficiente pa cubri e gastonan cu a pais a hereda a base di debe peligroso.

Na mes momento, economia di Aruba tabata den necesidad urgente di reforma economico debi na e hecho cu Citgo no por a entrega Aruba e crecemento economico cu a pone Aruba baila pero tambe kere den un futuro falso, cu na 2017 a laga Aruba den incertidumbre total.

E cifranan cu a keda atras den un e presuesto nacional na cambio di Gobierno na 2017, segun rapportnan no a duna prueba di seriedad.

Na 2018 mester a reforma Aruba y mester a habri caminda pa instancianan oficial por a bisa Aruba kico por spera of no spera.

Transicion di Gobierno na 2017 ta wordo refleha den e estado di e oficinanan di gobierno y hasta material di Pueblo cu no tabata presente.

E palabra “reforma” ta describi e tarea cu a wordo entrega na Prome Ministro Evelyn Wever-Croes na 2018 y cu tabata basa pa baha gasto di Gobierno y aumenta entrada di e pais.

Ora papia di reforma pa scapa un pais, no tin lugar pa wega politico. Aruba mester a sobrevivi y crea un futuro nobo, cu pandemia a basha abou.

Prome cu pandemia a desaparece, Vladimir Putin a deshaci di paz y trankilidad mundial.

Reforma ta e palabra mas importante den e temporada di Prome Ministro Evelyn Wever-Croes.

Si no a reforma Aruba continuamente for di 2017, e pais lo mester a bira provincia di Hulanda pa por a sobrevivi y si Hulanda a permiti.

Ta e tono di Hulanda, e forma cu Hulanda ta atende cu Aruba, ta e parametro mas importante pa midi e credibilidad di Prome Ministro Wever-Croes.

E tono di Hulanda a cambia mientras Aruba ta sobrevivi desastre financiero di 2017, pandemia y awe un crisis mundial cu ta exigi continuacion di reforma sigur awor cu mundo ta den e crisis mas pisa for di Segundo Guera Mundial.

Prome Ministro Wever-Croes merece credibilidad cu ta e condicion mas importante ora ta dirigi un pais?

Hulanda a bolbe bisa “si”. Hulanda a bandona su punto incondicional di entrega di 12.6 porciento di salario di trahadornan di Gobierno y awor ta dispuesto pa scucha con ta pone gasto y entrada den balansa.

E pregunta grandi ta keda kico reforma lo nifica awor pa Aruba den un crisis mundial cu a deshaci di economia mundial.

Den e situacion aki, e proyecto Eagle pa introduci gas pa WEB ta bini dilanti. Energia, combustibel, ta uno di e problemanan mundial mas grandi y paisnan cu a firma acuerdo di clima, ta inverti den creacion temporal di mas produccion di petroleo y gas.

Aruba tin un acuerdo firma cu Eagle LNG cu mester duna apertura na hasta distribucion di gas den e region.

Credibilidad di un gobernante no ta basa riba promesa bunita pero accion concreto.

E reforma mundial mas grandi for di Segundo Guera Mundial a cuminsa.

Den e fase mundial nobo, apertura di posibilidad economico ta pone prioridad na gobernantenan cu por pone cifra riba mesa. Cu por splica nan maneho y cu Reino por duna sosten.

E credibilidad di Prome Ministro Evelyn Wever-Croes despues di un crisis financiero y economico nacional, un pandemia cu a destrui economia y awor den un guera mundial, ta resalta den e actitud di Hulanda y e disposicion di Reino pa yega na solucion!