E compromiso di Gobierno ta pa cumpli cu e condicionnan cu a palabra cu Hulanda

The content originally appeared on: Diario

Prome Minister Evelyn Wever-Croes: — *Y paga tur empleado publico e 5% di salario bek na juli

ORANJESTAD (AAN):  “Mi ta mira atras riba reunionnan hopi fructifero den comienso di e siman aki hunto cu Secretario di Estado di Reino señora Alexandra Van Huffelen, Premier di Corsou, señor Gilmar ‘Pik’ Pisas y Premier di Sint Maarten, señora Silveria Jacobs”, Prome Minister Evelyn Wever-Croes a duna di conoce..

            Un logro principal pa Aruba ta e hecho cu a yega na un acuerdo cu Hulanda bou di cual condicionnan Aruba por stop e recorte di salario di 12.6%.  Aruba ta cumpliendo cu cada un di e condicionnan stipula pa Hulanda. Diabierna awor Hulanda ta bay Conseho di Minister di Reino pa aprobacion y si esaki wordo aproba y Aruba por demostra di ta cumpliendo cu e condicionnan, e ora lo por cuminsa na stop e recorte.

            Manera a wordo anuncia, tur cos ta poni pa juli 2022, Gobierno cuminsa paga e 5% na ambtenaarnan. Esaki sigur ta hopi importante mirando cu mundo completo a sali di un crisis y a drenta un otro cual ta e guera na Ukraina causando asina cu e prijsnan di petroleo, di gasolin y di tur producto importa pa Aruba a aumenta considerablemente. E efecto di subida di prijs di e productonan aki na otro parti di mucho, ta haci cu na Aruba tambe nan ta subi.

            Prome Minister a enfatisa cu Gobierno ta consiente y tin comprension cu esaki ta causa cu hopi famia ta pasando momentonan dificil. “P’esey e compromiso di Gabinete Wever-Croes ta pa cumpli cu e condicionnan cu a palabra cu Hulanda pa asina por debolbe tur empeado publico y esnan cu ta traha na fundacionnan subsidia pa Gobierno, nan 5% di salario bek”, Prome Minister Evelyn Wever-Croes a duna di conoce.