E buskeda di un paraiso Hulandes cu no ta existi

The content originally appeared on: Diario

Bon trabao di Arubahuis pa proteha studiantenan contra fracaso — *Destino cruel ta spera Arubianonan cu no logra realisa nan soño — *Situacion mundial nobo tambe un impacto serio pa bida na Hulanda

ORANJESTAD(AAN)- E forma con Arubahuis ta atende actualmente cu hobennan cu kier bay studia na Hulanda, ta di aplaudi. E realidad di bida na Hulanda ta worde presenta na e comunidad Arubano, cu hopi biaha no ta na haltura di e cantidad di problemanan cu “bay biba na Hulanda” ta contene.

E hecho cu Arubahuis ta prepara hobennan cu kier bay studia na Hulanda pa e realidad di e pais, ta di aplaudi.

E motibo mas grandi ta, cu comunidad di Aruba no ta conciente cuanto bez, fracaso na Hulanda a kibra bida di Arubianonan cu na un forma scondi, mester a mira nan soño pa felicidad bira infelicidad.

Bay studia na Hulanda ta un aspiracion di hopi hoben cu kier sigui studia pero tambe hobennan, cu mescos cu hopi adulto na Aruba, tin e pensamento cu Hulanda ta un paraiso.

E beneficionan social di Hulanda sigur ta hunga un papel importante, cu ta stroba hopi mira e realidad.

Por ehempel ta mira e salarionan halto na Hulanda compara cu sueldonan na Aruba pero no ta mira belasting y prima pa tur fondo social, cu mester paga for di e sueldo mescos cu gastonan mucho mas halto cu bida ta nifica na Hulanda.

Mucho mas serio ta e hecho, cu demasiado Arubiano ta haci otro hende kere cu nan ta feliz na Hulanda mientras esaki no ta e caso den e bida completamente diferente for di e realidad di Aruba.

Bida di e Arubiano na Aruba ta transcuri pa un gran parti na aire liber. Den casnan cu ta habri bentana.

Un gran cantidad di Arubiano cu bay biba na Hulanda tin problema serio cu nan bida den un camber chikito, den edificionan di apartamento cera, caminda nan no tin contacto cu naturalesa.

Factornan cu hopi bez no ta bini dilanti y sigur ta haci cu un cantidad mucho mas halto di hobennan tambe cu ta kere cu Hulanda ta un paraiso, ta experencia.

E situacion sigur a bira mucho mas serio awor cu Hulanda a bira un refugio internacional pa habitantenan di paisnan cu ta crea refugiadonan.

Mester admiti cu Hulanda semper ta ofrece ayudo na stranheronan den problema na nan propio pais.

Otro atraccion di Hulanda ta, cu e ta acepta tur condicion di bida.

Awe Arubahuis a haci algo sumamente importante. El a splica cu bo por tin exito pero tambe por fracasa na Hulanda.

E chens pa fracasa, cu demasiado tempo a keda scondi, awe a worde expone den e problema serio di vivienda, cu a empeora pero ya den pasado tabata parti di e problemanan serio cu e Arubiano a conoce na Hulanda, cu pa su posibilidadnan social a worde considera paraiso.

Ta bon pa hobennan haci caso di loke Arubahuis a trece dilanti pa evita decepcion, cu por resulta den situacionnan social serio cu no poco bez ta e realidad Hulandes.

Cuanto Arubiano no tin cas y mescos cu un grupo di Hulandes ta biba den auto y tin permiso pa haci uzo di cierto facilidadnan contra pago, cerca famia of amigo?

Situacionnan sumamente serio a presenta pa demasiado Arubano y ta di aplaudi cu awe un advertencia oficial ta worde emiti door di Arubahuis, cu sin duda conoce e dolor di e Arubiano sinta den un parke sin un lugar na bista pa e pasa anochi.

Realidadnan cu no ta bira conoci na Aruba, cu asina ta bandona nan cas pa busca un paraiso perfecto, cu no ta existi y ta bira nan caida.