E brug nobo di Spaans Lagoen lo carga nomber di Freddis Refunjol

admin

ORANJESTAD (AAN): Durante un conferencia di prensa yama pa Gobierno, Prome Minister Mike Eman, a anuncia cu conseho di minister a dicidi siman pasa, cu e brug nobo di Spaans Lagoen di Green Corridor, e nomber lo wordo dedica na gobernador Freddis Refunjol.

Durante di e periodo cu a construi e brug aki y henter e proyecto di Green Corridor, e tempo ey, Gobernador Freddis Refunjol tabata tin un atencion hopi special pa henter e construccion, bay den concordancia cu e tratado cu ta proteha nos area di flora y fauna y specificamente e mangrovenan di Spaans Lagoen, cu ta cay bao di tratadonan di proteccion y por a nota e tempo ey tambe un envolvimento hopi positivo di Gabinete di Gobernador y specificamente di Gobernador Freddis Refunjol pa e proyecto por wordo realisa tambe den cumplimento cu e tratadonan internacional.

Awor cu e proyecto aki a keda realisa y a bira en berdad un joya monumental pa pais Aruba, a haya importante tambe pa dun’e e realce cu e merece y dedica e nomber tambe na sr. Gobernador Freddis Refunjol. Durante di e dianan aki lo tin un momento tambe pa haci esaki definitivo y pa eternidad. Un palabra di gradicimento na ex Gobernador Freddis Refunjol pa su contribucion tambe durante e añanan di e Gobernacion Mike Eman I y II y den e caso specifico aki ta hay’e un gran honor di por a dedica un proyecto asina importante na su nomber.

 

Ken ta Freddis Refunjol?

Freddis Refunjol a traha 13 aña como docente di scol. Despues el a integra den politica, den partido MEP, pa 22 aña largo. Den e temporada ey el a sirbi nos pais pa 10 aña como Minister y 9 aña como Parlamentario. E ta e unico Arubiano cu a atende 30 apertura di Aña Parlamentario consecutivamente, sea como Parlamentario, Minister of Gobernador.

Freddis Refunjol a ocupa e puesto di Gobernador pa mas di 12 aña, desde dia 1 di Mei 2004 pa 1 di Januari 2017. E ta condecora tambe como “Commandeur in de Orde van Oranje Nassau”, cu ta e funcion mas halto den e ordo aki, despues di “Lid”, “Ridder” y “Officier”. Na Aruba e ta di 3 ciudadano cu dicho condecoracion, despues di defunto Watty Vos y e politico Benny Nisbet.

 

Next Post

A horta mas di 30 mil florin cash y hopi celular na Digicel Tanki Leendert

Caso serio den investigacion ORANJESTAD  (AAN): Dialuna mainta trahadornan di Digicel na Tanki Leendert a yega trabou y haya e pacus kibra y tur reboltea. Mesora a bati alarma na Polis y patruya di Playa a bay na e sitio. Na yegada a topa cu e trahadornan cu a conta […]