Durante presentacion na IPKO a pidi respet pa e autoridad di parlamento y pa salvaguardia autonomia

The content originally appeared on: Diario

Parlamentario Tromp-Lee (MEP): 

ORANJESTAD (AAN):  Prome dia di reunion di IPKO ta tras di lomba y esaki a bay hopi bon. Despues cu e reunion di IPKO a keda habri pa Presidente di Parlamento di Sint Maarten, sra. Heyliger-Maarten, den nomber di Aruba, Presidente di Parlamento sr. Edgard Vrolijk a tene un openingsspeech y mi persona como presidente di Comision di Koninkrijksaangelegenheden y Buitenlandse Betrekkingen a toca e honor pa haci un presentacion di algun desaroyo reciente di nos pais.

            Den mi presentacion mi a elabora riba nos presupuesto y a enfatisa nos situacion financiero economico delicado.  Alabes a duna atencion na e sosten di likidez ricibi for di Hulanda y cu nos ta gradici pa esaki. Na mes momento mi a indica cu e proyeccionnan economico y di nos turismo ta positivo y cu esaki sigur ta duna nos speransa. 

            Tambe mi a elabora riba e retonan den salubridad publico y preocupacionnan existente di basta tempo caba pa loke ta trata e recorte obligatorio cu ta un condicion exigi pa Hulanda. Esaki sin ningun investigacion of hustificacion alguno.

            Mas cu claro mi a papia di nos resposabilidad propio y cu nos ta bon consciente cu reforma ta necesario riba diferente tereno pa nos logra pone nos pais bek riba pia na un manera responsabel cu ta haci nos mas fuerte y resiliente.

            Mi a termina mi presentacion dunando e atencion debido na e dos leynan di concenso cu tin actualmente riba mesa, caminda mi a subraya e necesidad pa enberdad hiba discucionnan serio y alcaso pa loke ta trata respet pa e autoridad di parlamento di nos islanan y cu nos autonomia mester keda salvaguardia.