Dolor y posibilidad pesca local den crisis mundial

The content originally appeared on: Diario

Enfrente menasa recesion 2023 produccion di cuminda ta central

 *Economia blou na discusion enfrente menasa grandi di hamber

* Reduccion di flota di pesca na Hulanda y demanda halto pa pisca 

ORANJESTAD(AAN)- For di momento cu instancianan oficial internacional a bati alarma pa e realidad di hamber den e crisis mundial na 2022, DIARIO a informa Aruba riba uno di e realidadnan mas importante pa hende.

Alimento ta na peliger mundial, manera DIARIO a splica y e forma cu prijsnan a subi na 2022 a confirma e menasa cu a wordo presenta.

Manera DIARIO a splica, e Guera di Ukraine a topa cu mas elemento cu ya tabata exigi atencion mundial pa e produccion y e disponibilidad di alimento na mundo.

Uno di nan tabata petroleo como combustibel den un mundo cu ya a cuminsa sinti e efectonan di cambio di clima.

Reduci uso di petroleo a bira maneho pa futuro pa mayoria di pais liber pero tambe un reto pa hende cu a haci petroleo su combustibel mas usa riba tur tereno y casi no a ripara mas con dependiente mundo ta di petroleo y articulonan deriva di petroleo y peligroso pa medio ambiente manera plastic.

Manera na hopi ocasion DIARIO a trece dilanti, e problema directo pa atende cu petroleo ta keda, e papel scondi di petroleo den asuntonan diario y manera awor ta bini dilanti pa motibo di medidanan cu ta wordo tuma, pa pesca.

Na momento cu Guera di Ukraine a manda prijsnan halto na 2022, DIARIO a mustra cu Aruba mester cuminsa presta mas atencion na produccion propio di cuminda pa medio di agricultura, horticultura, cria y pesca.

Cambio di clima ta exigi pa e produccion di cuminda no tin tanto riesgo pa clima, loke awe ta nifica cu por ehempel na Hulanda, 79 piscado riba barco a acepta un areglo di Gobierno y lo stop nan produccion pa medio di pesca.

Ta wordo calcula cu na Hulanda di e total di 284 boto di piscado yama kotter, un cantidad halto di piscadornan lo bay di acuerdo cu e oferta di Gobierno Hulandes, loke lo reduci e cantidad di e piscadonan aki na Hulanda cu trinta porciento, cu ta un tercer parti.

Inversionnan nobo mester wordo haci riba tereno di pesca, cu mester di botonan cu no ta afecta lama.

Pa economia blou, cu ta e economia cu ta wordo produci dor di laman rond mundo manera pa medio di pesca, esaki lo tin un impacto.

Tecnologia lo mester yuda piscadornan den un situacion mundial cu ta papia di e cantidad creciente di demanda pa pisca riba tereno internacional.

Tecnologia lo mester habri caminda pa deshaci di motornan cu ta afecta medio ambiente.

Mundialmente mester proteha e cantidad di pisca den laman, cu ta wordo menasa pa demasiado pesca pero tambe pa polucion.

Pisca ta uno di e platonan favorito na Aruba sigur den temporada di fiesta, cu pisca tempera ta forma parti directo di e tradicionnan nacional.

Segun informacionnan prijs di pisca ta sigui subi mundialmente debi e demanda halto pa pisca, cu ta base di cantidad di industria tambe.

Boto di piscador tambe mester haya atencion riba nan mes pa e costonan enorme cu nan ta representa den un ramo sumamente duro cu peliger di laman, manera ta conoci.

DIARIO lo sigui informa riba e dolor y posibilidad di pesca, sigur riba tereno di e sistema di subi laman den boto pa pisca!