Docentenan di scol publico ta adverti di awor caba cu nan klasnan ta yen

The content originally appeared on: Diario

ORANJESTAD (AAN): Siman pasa ora cu SKOA a divulga cu posiblemente pa Aña Escolar 2022-2023,

lo bay cobra 585 Florin como Schoolgeld pa cada alumno cu ta bay Scol Basico, y 635 Florin pa cada alumno cu ta bay MAVO, e ola di reaccion a pasa manera un awacero torencial riba e isla.

   Diripiente Ministro di Enseñanza na su turno a indica, cu Scolnan Publico (esnan cu ta cay bao di Gobierno) lo no bay conoce ningun aumento di Schoolgeld.

   Esaki na su turno, a impulsa un cantidad di comentario den pueblo, di mayornan cu ta expresando cu awor nan tin intencion serio di kita nan yiu for di scolnan di SKOA, y busca forma pa pusha nan yiunan den scolnan di Gobierno.

   E ta un pensamento logico, y ta cay bao di principio di un consumidor semper lo escoge ki nivel di prijs e ta bay paga pa un producto of servicio.

   Pero tin di corda cu Scolnan Publico tambe ta bastante yen caba, y no tin extra cupo habri tampoco pa acepta mas alumno.  Esaki por a conclui tambe di reaccion di varios docente cu ta duna les na Scolnan Publico.  Nan ta bisa cu ya caba nan klasnan ta yen, y no tin ningun stul mas habri pa extra alumno.

   DOOR-STROMING: Y ta conoci cu pa hopi decada caba, Scolnan Basico cu ta cay bao di Gobierno ta fungi cu un sistema di door-stroming di nan alumnonan cu finaliza 6de Klas, pa si acaso nan bay MAVO, cu nan lo acudi na e MAVO School Publico cu e scol ta liga cune.

   Esey nifica, cu e MAVO Scol Publico semper tin cupo habri pa ricibi e fluho di alumnonan cu ta bin for di un Scol Basico cu ta cay bao Gobierno.  Y solamente si tin cupo extra habri, por ricibi un of mas alumno di otro scol of procedente di SKOA.

   Pero pa awor, e ta bay ta dificil como cu casi tur MAVO Scol cu ta cay bao di Gobierno a yega e maximo cantidad di studiante den klas y no tin lugar ni riba vloer mes pa pone un studiante nobo sinta.

   Pues esey nifica, cu e plannan pa “huy” di e Schoolgeld di 635 Florin pa un MAVO Leerling lo ta dificil por lo pronto.