Divi Golf Aruba N.V a firma CAO nobo cu FTA

The content originally appeared on: Diario

*reparti den tres aña empleadonan ta haya aumento di salario di 8.5%

ORANJESTAD(AAN): Diamars mainta a tuma lugar firmamento di CAO entre FTA y Divi Golf Aruba N.V.

Durante un conferencia di prensa manager di Divi Village & Golf Resort, Carol Jansen a bisa cu e CAO ta conta pa 80 empleado. “E proceso a bay hopi facil, mirando cu nos tin un bon relacion cu FTA”.

Tur cos a bay masha ‘smooth’ mes y nos ta contento cu nos por a yega na un acuerdo asina facil, pasobra e ta hopi importante pa nos empleadonan, segun Jansen.

Presidente di FTA Jose Figaroa tambe a hiba palabra. E tambe a bisa cu e negociacion a bay den bon ambiente. “E ta un relacion di hopi aña entre FTA y Divi en general”.

“Di nos banda nos ta hopi satisfecho cu e resultado y nos ta hopi agradecido na e team negociador di Divi y FTA cu a esforza nan mes pa yega na algo cu tur partido por biba cune”, segun Figaroa.

El a splica cu manera tur empresa Divi tambe a pasa den momentonan dificil debi na e pandemia, pero awor e situacion a normaliza y pesey por a bin cu adelantonan pa e empleadonan.

Rudy Geerman di FTA a gradici tambe gerencia pa e logro, e delegado di FTA y e trahadornan cu a deposita nan confianza den e sindicato.

Pa loke ta contenido di e CAO, Geerman a indica cu mas atencion a wordo poni riba e aumento di salario.

Ta trata di un contrato colectivo di 3 aña, unda cu e trahadornan lo haya un aumento di 8.5% reparti den tres aña.

“Akinan ta wordo demostra cu gerencia tin confianza den futuro di Aruba, pasobra apesar di e hecho cu e situacion ainda no ta 100%, e compania a dicidi di bay cu un CAO di 3 aña”, segun Geerman.

Banda di e aumento di salario, e empleadonan a haya mas dia di vakantie y e suma cu Divi ta pone un banda pa e empleadonan miembro di FTA den caso di un emergencia tambe a wordo aumenta.

Ademas di esaki e ‘vacation savings’ a aumenta di 6 pa 7%.