DIMP ta sigui conseha comerciantenan chikito pa nan aplica pa e areglo di ‘KOR’

The content originally appeared on: Diario

Nan lo no paga BBO tur luna mas!

ORANJESTAD (AAN): Durante un conferencia di prensa na Departamento di DIMP, e relacionista publico Meverly Romano di Impuesto a haya ta necesario pa corda tur comerciante chikito na Aruba, riba e oportunidad unico pa aplica pa un fabuloso areglo fiscal cu ta worde ofreci na nan.

   Ta trata aki di loke ta ser yama na hulandes como ‘Kleine Ondernemers Regeling’, conoci como ‘KOR’.

   “E ta algo hopi importante pa nos, y tambe pa e comerciante chikito,” Romano a indica.  E nomber ‘KOR’ ya a bira algo cu hasta comerciantenan chikito a cuminza usa e nomber ey ora di referi na dje na DIMP.

   KOR ta un beneficio fiscal cu ta wordo brinda na e comerciantenan chikito cu tin un empresa propio (eenmanszaak), y cu nan sa cu nan volumen di benta pa aña no ta pasa 84.000 Florin.  Esaki en principio ta ponebo bin na remarca pa KOR, aunke tin algun condicion mas.

   E beneficionan di KOR pa e comerciante chikito ta: (*) Bo no tin mester di entrega e declaracion di BBO/BAVP/BAZV tur luna.  (*) Bo no tin mester di paga BBO/BAVP/BAZV tur luna.  (*) Bo por reserva e extra cent pa otro necesidadnan di e empresa.  (*) Lo bo tin menos trabao administrativo.

   Pues un comerciante bao di KOR, ta haci pago di BBO solamente un biaha pa aña, via aangifte.

   Pa un comerciante chikito por bin na remarca pa KOR, e mester ta: (*) Un persona priva y ta biba na Aruba. (*) Mester tin un empresa propio (eenmanszaak). (*) E volumen di benta di e empresa ta 84.000 Florin of menos pa aña. 

   Lo bo wordo rechaza pa KOR, si e actividad di e empresa ta encera explotacion di un of mas propiedad inmobil pa uso no-residencial. Por ehempel: si e comerciante ta huur un propiedad cu ta worde uza como oficina, e no por haya KOR.    Romano a splica cu deadline pa aplicacion pa areglo di KOR, ta Dialuna 3 di October 2022.  Y bo por haci e peticion aki tambe online via e website di impuesto.aw

   Aki bo ta escoge ‘Digitale formulieren’ y bay pa ‘kleineondernemersregeling’ y sigui e instruccionnan. Ta importante pa upload e siguiente documentonan, esta un scan of potret cla di paspoort, rijbewijs of cedula, tambe copia di e cuenta anual di e empresa di aña 2021, y comprobante di registro na Camara di Comercio.

   Departamento di Impuesto lo evalua e peticion di KOR. Solamente e comerciantenan cu ta cumpli cu e condicionnan por haya KOR. Despues di evaluacion, Departamento di Impuesto lo informa e comerciante di e decision via e-mail. Lo manda e e-mail na e e-mailadres cu e comerciante a duna ora cu a haci e peticion di KOR online. 

   Esnan cu ya caba tin KOR:  Segun Romano, e comerciantenan cu ya ta beneficia di KOR den aña 2022, no tin mester di haci un peticion pa aña 2023, pero si mester entrega e declaracion anual na december/januari venidero. E ultimo dia pa haci declaracion ta 16 di januari 2023. Di e forma aki Inspector di Impuesto por evalua si e volumen di benta di aña 2022 a sobrepasa e suma di 84.000 Florin y determina si e comerciante por bin na remarca pa KOR den aña 2023. Si no entrega e declaracion anual, automaticamente e comerciante lo perde su status di KOR pa aña 2023 y mester cuminsa haci declaracion y pago di BBO/BAZV/BAVP den aña 2023.

   E comerciantenan cu a perde nan status di KOR pa aña 2022 y ta cumpli cu e condicionnan, por haci peticion pa KOR 2023.