Diez aña di prison exigi pa homber cu a hinca su ex-pareha 25 biaha cu cuchio

The content originally appeared on: Diario

ORANJESTAD (AAN): Fiscal a baha pisa riba e sospechoso Daury Gonzalez Brito, kende Fiscal ta haya culpable di intencionalmente a hinca e dama H. varios biaha na su curpa y e dama V. na su braza.

Fiscal ta considera esaki intento di asesinato y intento di maltrato severo. Fiscal a exigi 10 aña di prison.

   E acusacion: E sospechoso Brito ta worde acusa cu riba 19 Januari 2022, intencional a purba di asesina e dama H. door di hinc’e varios biaha cu un cuchio na su curpa parti dilanti, mientras cu e mesun dia el a purba di mata e dama V. door di hinc’e varios biaha cu un cuchio na su braza.

   Hinca ex-amiga 25 biaha: Durante tratamento di e caso a sali na cla cu e dama H. tabata pareha di e homber Brito y nan tabata biba hunto. Na October 2021, e relacion no tabata bon mas y H. a bay biba back cerca su mama V. na de Vuyst. Ambos ta traha den e sector hotelero y parce cu Brito a papia cu un homber cu ta traha na un hotel y el a bisa Brito cu e conoce H. Esaki lo a pone cu Brito a bira jaloers.

   Dia 19 Januari 2022, Brito a bebe y a bay na e hotel unda H. ta traha den oranan di atardi y cu un cuchio el a corta e ventil di e tirenan di e auto di H. Den oranan di anochi H. a haya un lift cu un colega pa bay su cas ya cu e tirenan tabata baha.

   Ora e tabata yegando, el a mira Brito ta na cas di su mama ta ward’e. El a dicidi di bay Polis y Polis ya caba a haya notificacion cu tin hende no desea eynan.

   Polis a dicidi di bay cu H. na su cas y ta papia cu Brito. Esaki tabata mas o menos 9:30’or di anochi caminda H. a bisa Brito cu e por tin relacion cu ken e kier. Polis a bisa Brito pa move, cual el a haci tambe.

   Brito a bay sigui bebe y tur e jaloersi a keda traha riba dje. Pa mas o menos 10:30’or el a bolbe bay e cas y el a hinca H. un total di 25 biaha na su lomba, nek, pecho y parti ariba di su curpa.

   Ora cu e mama V. a bay purba stop Brito, Brito a hinca e mama 2 biaha tambe na braza.

   Exigencia di Fiscal: Fiscal ta haya legalmente proba cu riba 19 Januari 2022, Brito a hinca e dama H. y e dama V.

   E ta considera cu Brito ta culpable pa intento di asesinato y intento di maltrato severo. Fiscal a condena total e forma agresivo con Brito a hinca e dos damanan. El a mustra cu intencionalmente y premedita Brito a bay back e cas, despues cu Polis a bis’e pa bay y a hinca e dama H. 25 biaha. Fiscal a bisa cu milagrosamente H. a scapa. Pa un tempo e no por a cana y mester a haya terapia pa por cana, siña come, haci su necesidad. Nervio na su mannan a keda daña cu a causa cu e no por sera su man bon.

   E mama V., kende a bay yuda su yiu a sufri 2 hinca den braza. Fiscal a mustra cu e cuchio cu Brito a usa ta un cuchio grandi cu ta usa pa corta carni. Fiscal a mustra cu Brito ora el a drenta e cas el a bisa H., “si bo no por ta cu mi bo no por ta cu ningun hende mas”. El a exigi 10 aña di prison, kitando e tempo cu Brito ta sera den KIA.

   Abogado: Su defensa mr. E. Kuster a bisa Hues cu mester tene debido cuenta cu psychiater, den su raport di evaluacion di Brito, ta conclui cu Brito no ta completo responsabel pa loke el a haci.

   Hues a sera tratamento di e caso y a bisa cu e ta bay studia e caso bon y dia 13 Mei 2022 lo tin sentencia.