Diesdos luna di prison pa menaza y maltrato cu arma di candela

The content originally appeared on: Diario

ORANJESTAD (AAN): E homber N.S. di 34 aña riba Diahuebs mainta a scucha Hues conden’e na 12 luna di prison,

di cual 6 luna ta condicional pa a menaza y maltrata e homber K. cu un arma di candela. Tambe S. ta culpabel di posesion di un arma.

   Menaza y maltrato cu arma: E acusacionnan cu Fiscal a presenta den Corte contra S. ta cu riba 21 October 2023, el a menaza e homber K. cu un arma di candela, a maltrata K. cu e arma di candela y posesion di un arma di candela. Fiscal a bisa cu S. lo por tabatin algo cu ta parce un arma di candela, pero segun ley esey tambe ta castigabel.

   Hues a puntra S. si ta berdad e acusacionnan. S. a bisa cu e mainta ey e tabatin discusion cu K. y el a bay cas coy un “bibi gun”, pasobra el a sinti su mes amenaza. Segun S., e tabata bou influencia di alcohol y ora K. a push’e el a sinti si mes menaza y a bay cas den su auto y a coy e pistool di kelki. Segun S. e tabata den su auto y a bay cerca amigonan. Un rato despues, K. a bay riba dje y a puntr’e algo. Despues a push’e. E ora ey S. a bay cas, busca e pistool. Ora el a bolbe, el a saca e arma riba K. y despues a dal’e cu e arma aki diferente biaha. Despues di esey, S. a bay den su auto y core bay.

   Hues a mustra cu K. a declara cu ora el a mira S. cu e arma, el a kere cu S. lo tir’e. Ta asina cu S. a tira e arma afor y Polis no a hay’e. Hues a mustra cu Polis a papia cu diferente persona na elugar. Tin testigo a bisa cu a mira S. para banda di Johnson Supermarket y a tira e revolver den un rooi.

   Fiscal: Fiscal a bisa cu e ta haya legalmente proba tur e tres acusacionnan. E incidente a sosode den oranan di mainta. Fiscal a bisa cu e camaranan di seguridad den vecindario, a capta tur cos. Na opinion di Fiscal, algo a sosode promer y S. a bay busca e arma pa regla cuenta cu K.  Acusado S. mes a declara cu e tabata rabia y no tabata sinti su mes menaza. Fiscal a sigui bisa cu riba camara por mira cu S. ta yega cu su auto, sali for di e auto, saca e arma, menaza K. y despues ataca K. cu esaki. S. a dal K. un of dos biaha cu e arma.

   Na opinion di Fiscal, S. ta bisa cu e arma no ta di berdad. Polis a bay busca e arma pero no a hay’e. Fiscal a remarca cu e no sa si mester kere S. El a bisa cu e arma ta parce un arma di candela y por worde usa pa menaza hende. Fiscal ta haya cu esaki ta un caso serio. Fiscal a tuma S. na malo pasobra na 2020, S. a worde condena na 5 aña di prison pa atraco cu violencia cu arma.

   Dia 14 December 2022, segun Fiscal, S. a haya un chens y a worde laga liber. Den su tempo di prueba, S. ta bolbe haci un delito serio. Fiscal ta haya cu ta parce cu S. no ta tuma esaki na serio. Fiscal a exigi 12 luna di prison pa S.

   Abogado ta bisa cu e arma no ta di berdad: Abogado mr. Kuster a bisa cu S. a admiti di a menaza y dal e homber K. pero e arma, no ta uno di berdad. Na opinion di abogado, S. a bisa den Corte atrobe cu ta un pistool di kelki. Abogado ta haya cu tabata un decision bobo di S., di a bay busca e arma.

   E abogado a bisa cu Recherche no a haya e arma y e abogado ta para riba cu e arma no ta un arma di candela. Durante tempo di prueba, S. a haci esey. E tabata burachi e dia ey. Abogado ta haya cu e castigo exigi pa Fiscal, lo bay afecta S. cu su trabao cu e tin actualmente den e restaurant di su mama.

   Castigo combina y cu guia severo di Reclassering: Hues a cera tratamento di e caso y a dicta sentencia di biaha. Hues a bisa cu e ta haya legalmente proba tur tres acusacion. S. a admiti di a saca un arma pa K. y a maltrata K. cu un arma. Hues a bisa cu si ta un arma di candela of un pistool di kelki, pa ley e ta worde considera como un arma di candela.

   Hues a bisa cu e ta bay duna acusado S. un chens ya cu S. a bisa den Corte cu e kier haya ayudo pa controla su agresividad. Hues su sentencia ta diferente cu loke Fiscal a exigi. El a condena S. na 12 luna di prison di cual 6 luna ta condicional. Mester kita for di e castigo, e 13 dianan cu S. tabata sera. Hues a bisa cu e ta pone condicionnan special pa S. El a bisa cu S. mester sigui e curso di control di agresividad y cu S. mes mester paga esaki. Durante e periodo di prueba di 2 aña, Hues a prohibi S. di bebe alcohol y usa droga. Tur esaki ta cay bou guia di Reclassering. Hues a bisa cu e ta duna Reclassering e autoridad pa haci testnan regular cu S. pa mira si e ta bou influencia di droga y alcohol.