Dies aña di prison pa homber cu a hinca dama 25 biaha cu cuchio

The content originally appeared on: Diario

E acusado ta culpable di intento di asesinato premedita

ORANJESTAD (AAN– Diabierna mainta e homber Daury Gonzalez Brito, via video conference, a scucha Hues bisa cu e ta culpable cu dia 19 Januari 2022 el a haci intento di asesinato premedita riba e dama N.H. y maltrato riba e mama di N.H., R.V. Hues a confirma e exigencia di Fiscal y a condena D.G.B. na 10 aña di prison.

FISCAL A EXIGI 10 AÑA

Luna pasa tratamento di e caso a tuma lugar caminda Fiscal ta haya legalmente proba cu riba 19 Januari 2022, Brito a hinca e dama H. y e dama V. E ta considera cu Brito ta culpable pa intento di asesinato y intento di maltrato severo. Fiscal a condena total e forma agresivo con Brito a hinca e dos damanan. El a mustra cu intencionalmente y premedita Brito a bay bek e cas di H., despues cu Polis a bis’e pa bay y a hinca e dama H. 25 biaha.

Fiscal a bisa cu milagrosamente H. a scapa. Pa un tempo e no por a cana y mester a haya terapia pa por cana, siña come, haci su necesidad. Ta parce cu nervio na su mannan a keda daña cu a causa cu e no por sera su man bon. E mama V., kende a bay yuda su yiu a sufri 2 hinca den braza. Fiscal a mustra cu e cuchio cu Brito a uza ta un cuchio grandi cu ta uza pa corta carni. Fiscal a mustra cu Brito ora el a drenta e cas el a bisa H., “si bo no por ta cu mi bo no por ta cu ningun hende mas”. El a exigi 10 aña di prison, kitando e tempo cu Brito ta sera den KIA.

SENTENCIA

   Hues a bisa cu e ta haya Brito culpable di intento di asesinato y intento maltrato di e N.H. y R.V. Hues a sigui bisa cu e no ta haya proba e intento di maltrato severo di e dama R.V.

PREMEDITA A HINCA 25 BIAHA

Hues ta haya legalmente proba cu premedita, Brito a hinca e dama H. Hues a mustra cu dia 19 Januari 2022, Brito a papia cu un persona kende a bisa cu e ta saliendo cu N.H., kende tabata e pareha di Brito.  El a bay corta ventilnan di e auto di N.H., na unda N.H. ta traha. E ora ey N.H. a busca un lift. Ora N.H. tabata yegando cas N.H., el a mira Brito para dilanti cas y a dicidi di bay Polis. Polis a bay na e cas y a core cu Brito. Esey tabata 9’or di anochi. Mas o menos 1 ora despues Brito a bolbe e cas. N.H. a tende un glas kibra. Ora el a bay mira ta Brito a kibra un glas di e porta dilanti y a drenta den e cas. Sin bisa nada, Brito a hinca N.H. 25 biaha cu forza. E victima a keda lesion. Na opinion di Hues, no tin ningun indicacion cu Brito tabata burachi. Tur esaki ta mustra cu ta premedita.

CASTIGO DI 10 AÑA DI PRISON

Pa cu e castigo, Hues a bisa cu e ta tene cuenta cu seriedad di e hechonan. El a bisa cu e victima a sufri 25 hinca di cuchio y lo keda cu cicatriz. Hues ta haya e castigo exigi pa Fiscal na su lugar. Hues a condena Brito na 10 aña di prison, kitando e tempo cu e ta sera den KIA.