Diasabra cu a pasa tabata net 105 aña di morto di Dr. José Gregorio Hernández

The content originally appeared on: Diario

ORANJESTAD (AAN): Riba Diasabra 29 di Juni 2024, a marca exactamente 105 aña cu un accident di auto a socede na Caracas (Venezuela),

y eynan e “Docter di Pobernan”, Dr. José Gregorio Hernández (cu awendia ta un beato) a perde su bida.  Asina el a participa den e gloria di cielo.

   Na Venezuela a tene diferente misa special pa conmemora e fecha aki.

   Ora cu e accident fatal a socede, Dr. José Gregorio Hernández tabatin 54 aña di edad, y na Caracas a wordo atropeya pa un auto Essex 1918 maneha pa Fernando Bustamante.

   Tabata 29 Juni 1919 cu Dr. José Gregorio Hernández despues di a bishita su pashentnan malo y cumpli cu su obligacionnan religioso, el a regresa cas y a come pa 12’or di merdia.  Banda di 1:30 pm, mientras e ta wardando manera costumber pa su ruman César yega su cas, nan a yame cu urgencia pa bay atende un dama di edad grandi, kende ta biba na skina di Amadores y Cardones, cu ta den situacion grave.  Prome di bay pa samina e dama, el a pasa na Botica de Los Amadores pa prepara cu Vitelio Utrera un recept di remedi cu el a prepara.

   Dr. José Gregorio Hernández a sali di e Botica y a ripara cu trafico riba e caya No. 27, di Plaza Bolivar pa La Pastora tabata stagna na e skina di Amadores, y el a dicidi pa cruza e caya pa bay rumbo Cardones.  Net e momento ey Fernando Bustamante coriendo e auto Essex 1918 a trata di pasa riba e caminda.

   E chauffeur Fernando Bustamante a spanta pa mira un peaton crusando su dilanti, y e no por a brake rapido, aunke di baina e tabata coriendo 30 km/h, sin haya chens di desvia.  El a dal e peaton fuertemente na su pianan, net riba rudianan, cu e wantalodo banda drechi di e auto.  E accident a sosode banda di 2:00 pm.

   Dr. José Gregorio Hernández a tambalea, pero no a logra recupera su balans y ora el a cay el a fractura su craneo net na e rand di acera, cu a causa e morto di e ilustre Docter algun minuut mas laat na Hospital Vargas.

   E documento di fayecimento, ta indica cu Dr. José Gregorio Hernández a fayece pa 2:30 pm.  Rapport di Docter ta indica cu el a sufri fractura na e base di craneo, a haya edema bao di su klepnan di wowo, sangramento fo’i nanishi, orea, y boca, y rascanan na su pianan net riba rudianan.

   Polisnan a detene e chauffeur Fernando Bustamante di 28 aña, y dilanti Corte di Prome Instancia di Distrito Federal el a declara: “Ningun hende a lamenta mas cu ami, ningun otro hende por a sinti con sensibel y doloroso e accident aki, y di e morto di mi amigo, Dr. Jose Gregorio Hernández.

   Dia 1 di Augustus 1919, miembronan di famia Hernández a manda carta pa Huez, den cual nan ta pidi pa no duna ningun castigo na Fernando Bustamante, pasobra nan ta convenci cu nan ta convenci cu e suceso den cual Dr. Hernández a fayece ta debi na un accident, sin ningun mal intencion.

   Dia 11 di Februari 2020, Corte di Husticia a emiti un ordo pa libera Bustamante mesora for di prison.