Detencion di Dentista Kawaiah a wordo prolonga

The content originally appeared on: Diario

ORANJESTAD (AAN):   Despues cu e tabata tin prohibi pa eherce su profesion pa motibo cu tin un investigacion tumando lugar, siman pasa, diaranson e ortodontista cu tin un consultorio na Cumana a wordo deteni.

            E motibo di e detencion ta cu e tabata trahando di forma ilegal y Inspeccion di Medicina a gar’e despues cu a emiti un prohibicion.

            Pa e motibo ey, DVG a kita su licencia pa traha. Ni sikiera e tabata tin registro di AruBIG cual ta rekisito pa eherce na Aruba y AZV a anuncia siman pasa cu no tin contract mas cu e doctor mientras cu tin un investigacion ta tumando lugar.

            Den fin di siman, te hasta a apunta un ortodontista colombiano pa substitui Kawaiah y atende cu su pashentnan.

            E doctor, a pesar di tur esaki, a gewoon dicidi di sigui traha ‘clandestinamente’ aunke e tabata tin prohibicion.

            DIARIO a haya sa cu den pasado, varios caso te hasta a bay corte relaciona cu mal praxis cu e doctor lo a yega di realisa unda pashentnan a keda marca psicologicamente te dia di awe.

            Awor tambe parce cu e docter tabata cobrando di forma adelanta na algun pashent, pero nan a keda sin haya nan tratamentonan, cual di mes cu ta tratamentonan caro.

            Por corda tambe como otro doctor, esta Dr. Hendrik Marsman a bin cu diferente ponencia dilanti unda e ta cuestiona e specialista su credencialnan pa traha como ortodontista na Aruba. Parce cu tambe na Canada, unda e tabata biba, tin algun caso cu a tuma lugar.

            Awe, por fin, despues di basta tempo cu cosnan ta biniendo pa dilanti relaciona cu e ehercicio di Dr. Kawaiah na Aruba, tin un investigacion tumando lugar cu lo trece claridad relaciona cu e caso aki.     Evidencia y pruebanan parce cu tin y awor lo keda na autoridad dicidi kico lo ta e veredicto pa e meneer aki procedente di Algeria.

            Dialuna atardi, hues comisario a bay di acuerdo cu e solicitud di fiscal di Ministerio Publico pa prolonga e detencion di A. Kawaiah un siman mas pa asina por sigui cu e investigacion relaciona cu su persona.