Destruccion economico Ruso por tin impacto mundial pisa

The content originally appeared on: Diario

No mas petroleo y gas di Rusia ta e arma mas eficiente den guera — *Mundo ta prepara pa e pio scenario economico di guera Ukraine — *Haf di Rotterdam tambe mester vigila resultadonan pa su entrada

ORANJESTAD(AAN)—E cadena economico mundial tin paisnan grandi na careda.

Kico lo pasa si mundo liber scrap tur negoshi den petroleo cu Rusia?

Mientras Gobierno Joe Biden ta sigui manda Miyones y Biyones di asistencia financiero y militar pa Ukraine, e gobernante Mericano encarga cu asuntonan financiero di e pais, Yellen, a bati alarma ayera.

Yellen a adverti pa e resultadonan cu abandono di petroleo Ruso dor di mundo liber lo tin pa economia mundial.

Su advertencia tabata lat pa cantidad di pais cu a cuminsa prepara pa deshaci di entrega di productonan, petroleo y gas di parti di Rusia na nan pais.

Alemania a hunga un papel central cu su postura di mustra con el a cuminsa baha importacion for di Rusia pa dentro di algun luna scrap Rusia como su importador.

Cifranan di cual nos ta dispone, ta mustra cu ya economia Ruso a baha cu diez porciento a base di caida di demanda pa e productonan petrolero di Rusia.

Ayera a habri cu e alerta cu por spera cu cierto paisnan por pidi pa practica cautela den e sancion mas importante, cu ta fin di importacion di petroleo Ruso dor di mundo liber.

DIARIO tabata sigui tur informacion y a tuma nota di e resultadonan cu menos negoshi cu Rusia.

Interesante ta sigur pa Aruba pa sigui e resultadonan financiero cu medidanan tin pa negoshinan grandi di Hulanda, loke lo tin resultado pa Hulanda.

Ora tuma nota di cifranan di e haf di Rotterdam por mira con medidanan ta afecta un fuente importante di entrada Hulandes y pakico economistanan mundial ta papia di un “worst case scenario” (e pio escenario) pa economia cu ta encera no mas importacion di petroleo entre otro for di Rusia.

Informacion di DIARIO ta indica, cu Puerto di Rotterdam ta depende pa 15 porciento di trasborde di producto Ruso y otro lugarnan.

Trasborde di carbon mescos cu gas LNG ta representa 20 porciento y trasbaborde azeta crudo ta representa 30 porciento.

Un pregunta cu ta wordo lansa na e momentonan aki dor di economistanan riba plataforma mundial ta, kico e produccion di armanan na e momento aki ta encera.

Pa hopi tempo mundo no a conoce un guera cu a haci necesidad di armanan pisa necesario.

Informantenan ta indica cu e desaroyonan di guera ta deshaci di negoshinan existente mientras na mes momento ampliacion di produccion di material di guera, ta bira necesario.

Ta keda naturalmente algo inpagabel den e conflicto mundial cu ta e ser humano, cu riba tur tereno ta victima di e invasion Ruso na Ukraine.

E caida economico mundial no ta afecta solamente Rusia pero henter mundo cu a perde tur seguridad y mester introduci un futuro completamente nobo.