Despues di 1815 na Aruba no tabata tin mag di papia Papiamento

admin

Joyce Pereira:

ORANJESTAD  (AAN): Ta bay celebra e di 14 aña cu Papiamento ta oficial na Aruba. Na 2003, den Parlamento a aproba e ley cu ta oficialisa Papiamento. Segun Joyce Pereira, kende ta vice-presidente di fundacion Lanta Papiamento, a comenta cu e pregunta semper ta di con awo numa ta 14 aña.

Di con semper ta Papia, di con semper tin hopi opinion. Si mira historia, ta mira cu den historia semper a bringa Papiamento. Te ainda ta ripara den corant, cierto corant, nos ta habri nan boca pa promove Papiamento y ta bin remitido cu ta bisa “ata e hendenan loco cu Papiamento.”

Segun Pereira, henter historia colonial cu nos a pasa aden, tin algo masha peculiar. E prome 200 añanan di colonisacion, Hulandes tabata prohibi pa pueblo. Hulandes tabata reserva pa e elite colonial Hulandes. 200 aña te cu mas of menos 1815, Papiamento a desaroya den tur su forma. Ora cu Reino Hulandes a keda estableci na 1815, diripiente a prohibi Papiamento y Hulandes a bira obligatorio.

Nan a purba di hinca esey den un manera sutil den enseñansa. For di e tempo ey tin e lucha. Ora cu confronta mucha chikito di 6 aña na school cu e regla cu Papiamento no ta idioma y cu Papiamento ta prohibi, e pober mucha ta kere esey y e ta lanta den henter e sistema ey. El a pasa di un generacion pa otro, 200 aña largo. Te dia di awe, nos hendenan ta completamente convenci cu nan idioma no ta idioma.

Pesey tin un lucha hopi fuerte di hopi aña caba, pa mustra pueblo cu ki mishi un otro hende ta bin bisabo cu bo idioma no ta un idioma, cu e no ta sirbi, cu ta idioma Europeo so ta idioma. Ningun hende no tin derecho di bin bisa un pueblo cu su idioma, su cultura, no ta sirbi. Pero nos pober hendenan, cu no tabata tin informacion, e muchanan chikito a lanta den e sistema ey te dia di awe, ta un lucha masha duro tin.

Tin hende pro y tin hende contra Papiamento. A ripara cu e grupo cu ta pro e Papiamento, ta creciendo. E fundacion ta existi e aña aki 7 aña. A lans’e e mesun dia cu a celebra pa prome biaha e oficialisacion di Papiamento. A organiza masha hopi evento y a ripara cu e eventonan ey, tin mas hende cu ta den seno di Aruba ta organiza evento relaciona cu Papiamento. A ripara cu e anochinan ey ta hopi bon bishita.

Cada biaha ta mira cara nobo, segun Pereira, despues di 2003, door di e ley cu ta bisa cu por uza Papiamento tur caminda oficial tambe, tin un sector so cu nan a prohibi’e y esey ta e ley mes ta papia di discriminacion den anexo cu e ta pone despues.

Door di esey, a haya e briyo di bay traha material, traha curiculo pa school cu te awor aki cu tin dos school cu ta na Papiamento, cu ta bayendo masha bon mes. Ta yama e school Multilingual, cu tin Papiamento como base, como idioma di instruccion y tres otro idioma stranhero, cu e mucha ta siña tambe, na un manera corecto.

No manera awor aki cu ta pusha e Hulandes riba e mucha y kita su Papiamento riba dje, cu e no por siña ni Hulandes y e ta perde su Papiamento. En todo caso e ley aki a habri porta pa hopi cos. Tin Papiamento na e dos schoolnan aki. Awor aki ta preparando mas school pa drenta e proyecto. Tin Papiamento na school secundario.

El a drenta hasta klas di examen HAVO/VWO. Mavo e tabata tey caba y e ta na EPB. A prepara den pasado maestro di 3 grado di Papiamento. Ta bay cuminsa cu Papiamento Bachelor, y hunto cu Corsou, tin e Master di Papiamento tambe, cu ya caba tin diferente hende cu a gradua pa e Master, cu ta necesario pa haci investigacion, pa por traha na e nivelnan mas halto di enseñansa.

Tin grupo di traductor cu tur departamento di Gobierno mester tin awor aki un grupo di corector. Un corector pa por coregi e Papiamento cu nan ta uza den e carta of documentonan oficial di cada departamento. Nan por traduci tambe di Hulandes pa Papiamento.

Tin un sector cu te ainda ta discrimina Papiamento, cual ta e sector hudicial, cu tin para den e ley, cu te ainda e idioma di husticia ta Hulandes, cu masha hopi problema.

Un di e problemanan ta, cu e polisnan mester skirbi nan rapport na Hulandes, y esey por tin masha hopi problema. Un hende cu no ta domina Hulandes bon, tin cu busca un traductor, pa e por combersa of compronde hues. Tin basta problema cu esey. Ta contento cu e ley, pero e no ta cla.

No ta asina cu e ley ta papia di uso di Papiamento den comunidad, con e mester ta. Uso den prensa, uso den e diferente areanan di enseñansa, den comercio. En realidad, e ley mester cubri tur area di comunidad, plus husticia. Tin hopi co’i haci ainda na e ley. Segun Pereira, un di e tareanan di e fundacion ta pa habri e discusionnan atrobe, pa wak con por amplia e embergadura di e ley aki.

 

 

Next Post

Ley di onderwijsfonds a yega Parlamento di Aruba

Parlamentario Jeffrey Kelly: ORANJESTAD (AAN): E Landsverordening cu ta reglamenta e presupuesto di fondonan di enseñansa (onderwijsfonds) a yega Parlamento di Aruba. Esaki Parlamentario Jeffrey Kelly ta splica y ta mustra cu via e onderwijsfonds lo inverti un suma di casi 7 miyon Florin den diferente areanan y diferente aspecto […]