Den temporada di horcan mester habri caminda pa futuro

The content originally appeared on: Diario

Aruba na caminda pa e salida di e prome mitar di 2022 — *Expertonan ta di acuerdo cu turistanan lo bay gasta menos — *Na caminda pa pagara 2023 retonan grandi ta spera mundo

ORANJESTAD(AAN)—2022 tabata un aña sumamente special. E momento di recuperacion mundial despues di Covid-19, a bira mas intenso cu hende por a pensa.

Medidanan ad hoc, pues pasonan diferente for di loke a planea, mester a wordo tuma y cada dia a trece preocupacionnan nobo.

Den e cantidad di cambionan cu mester a tuma riba tur tereno pa adapta y sigui adapta na exigencianan cu cada dia a presenta pa tur sector di tur comunidad y di mundo, atencion hopi bez a wordo kita for di otro asuntonan sumamente importante, cu ta exigi atencion.

Na prome lugar mester acepta cu 2022 tabata tin ala y ta bula bay. Ya e prome parti di 2022 ta casi pasado y Aruba ta drenta e temporada cu ta marca Fiesta di San Juan, cu ta nifica automaticamente, cu e temporada di yobidanan causa pa sistemanan tropical, a cuminsa.

Ta den un temporada di horcan, pa cual region di Caribe mester prepara su mes, ta drenta e segundo parti di 2022 na caminda pa un 2023, pa cual mundo sigur mester prepara ya cu e cambionan cu ta anuncia nan mes, lo ta realidad.

Mester atende cu e temporada di horcan na e momentonan aki debi na e informacionnan cu ta indica cu e por ta un temporada di basta actividad di sistemanan cu por causa problema.

Preparacion di tur factor mara na e temporada aki pues ta bira importante, mescos cu e realidad cu e placa cu Aruba ta ricibi di turismo, tin chens grandi pa baha.

Den e ultimo frase aki por nota e variacion di asuntonan cu lo exigi atencion pasobra di temporada di horcan nos a pasa pa e parti financiero cu sigur lo mester haya tur atencion na Aruba.

Ayera Gobierno di Aruba a reuni cu e comision di supervision financiero di Aruba y den proximo dianan DIARIO sigur lo duna tur informacion riba e tereno aki cu luho di detaye.

Importante ta bira con comunidad mester adapta su mes financieramente na e situacion nobo no solamente na Aruba, pero manera DIARIO a mustra na hopi occasion, na henter mundo.

Na Merca ya expertonan a mustra cu e Mericano tin menos placa pa gasta. Pues turistanan cu bini Aruba, manera DIARIO a spirta, tambe lo tin menos placa pa gasta.

Oficialmente Merca a mustra cu Mericanonan lo biaha menos pero tambe lo gasta menos placa ya cu nan tin menos placa pa gasta.

Esaki ta hiba na e declaracion di informantenan clave cu diversificacion ta bay hunga un papel importante den e maneho den tur sector durante e segundo parti di 2022.

Fin di Juni ta marca final di e prome mitar di 2022. Plannan pa recuperacion mundial ta wordo adapta continuamente pa yega na solucionnan pa un futuro cu oportunidadnan nobo, retonan nobo na entrada di un epoca mundial di retonan grandi.