Den Gabinete Wever-Croes II cada ministro ta traha cu maximo 25 persona cu tin nan specialidad

The content originally appeared on: Diario

Premier Wever-Croes ta refuta “nepotismo” den gobierno:


ORANJESTAD (AAN) – Prome Minister Evelyn Wever-Croes a splica den conferencia di prensa, siguiendo cu e tema di organizacion di personal, cu ora Gabinete Wever-Croes a drenta den gobernacion, a dicidi cu cada minister mester traha cu locual ta usual den gobierno.

Riba grafico ta mustra e schaalnan y cual ta e funcionnan cu por haya un toelage, manera auto, telefon y un compensacion di 25%, pasobra un persona cu ta traha den oficina di un minister, mester tey 24/7, y esnan cu ta traha cune por confirma cu ta asina.

E dignatario a comenta cu hopi biaha ora e ta comunica cu nan, ta despues di 6 or di atardi, pasobra durante e dia e ta ocupa den diferente reunion.

E mandatario a indica cu pregunta a wordo haci tambe, tocante cuanto persona ta traha na oficina di minister. “Nos a palabra cu e maneho di 2017, nos ta limite na 25 persona pa cada ministerio. Na cierto momento, e minister di husticia e tempo aya, cu tabata encarga tambe cu integracion, a pidi pa aumenta e cantidad, mirando cuanto hende ta frecuenta bestuurskantoor, pa atende cu tema di permiso. Y e ora ay, pa un periodo breve, a permiti pa ta mas cu 25 hende, el a yega 27 na cierto momento, pero aworaki ta na 25 y por mira con e ta reparti”, Minister Presidente a señala.

Esaki ta e situacion te 11 di November siman pasa, ora cu el a haci inventarizacion. Asina e dignatario a señala. “E cosnan aki ta cambia, nos tin hendenan cu ta bin y hendenan cu ta bay. E momentonan aki, pues bo ta mira e cantidad di personanan”, segun e mandatario.

El a splica tambe cu Minister Endy Croes, por ehemplo, tin menos hende, door cu ex-minister Rudy Lampe a traha cu masha poco hende, y no tin presupuesto pa aumenta su personal, pero e tin mester si di mas hende pa yude.

“Cu esaki, pues, mi kier duna e transparencia cu a wordo pidi na nos, pa duna informacion di con e ministerionan ta hinca den otro. Manera mi a bisa, ora nos a drenta no tabata tin nada regla. Por ehemplo, mi a tuma over un payroll di tempo cu Minister Presidente tabata señor Eman, cu na momento di su salida tabata tin 147 hende riba su payroll. Temponan prome cu esey, el a yega te 300 na cierto momento; y ami ta traha cu un cantidad maximo di 25 persona, aworaki 16 y ohala prome cu fin di aña mi por haya e dos conseheronan cu nos ta buscando riba tereno di infrastructura pa nos por yega na 18. Pues, esaki ta pa duna un indicacion, con nos a drenta y nos a dicidi cu nos ta bay baha e gastonan. Esaki tambe nos a comparti cu e sindicatonan y cu Parlamento varios biaha, y mi ta bolbe splica con e ta hinca den otro. Nos no ta traha cu un cantidad grandi di persona. Nos ta wordo tilda hopi biaha di nepotismo. Nepotismo ta ora bo ta tuma hopi hende den servicio, sin importa nan preparacion of sin cu bo sa si nan por haci e trabao, pero bo ta tuma nan simplemente pasobra bo conoce nan, nan ta amigo of sostenedo”,

Prome Minister a remarca. El a subraya cu ora ta traha cu 25 hende maximo den cada ministerio no tin espacio pa nepotismo pasobra nan mester di cada un di e 25 personanan aki, den nan specialidad pa yuda nan haci e trabao.