Democracia na Aruba no por bira vehiculo criminal!

The content originally appeared on: Diario

Topico na regreso na bida normal despues di temporada di Carnaval


Parlamento mester traha riba aumento castigo pa corupcion
Base autonomia y Parlamento propio ta ”Vox Populi, Vox Dei” 

ORANJESTAD (AAN) E hecho cu atrobe Aruba ta wordo confronta cu un caso den cual un politico cu a ocupa funcion halto ta keda deteni pa autoridad, ta un topico cu ta wordo comenta den comunidad di Aruba cu hopi preocupacion.

Celebracion di Carnaval sin duda tabata tin impacto riba e interes demostra pa publico pa sucesonan general den mundo politico, pero na final di e temporada uno di e topiconan mas importante awor ta, e forma cu autoridad mester persigui politiconan cu a abusa di e confiansa di Pueblo y cuidadanonan cu a usa corupcion como nan vehiculo den e proceso democratico di Aruba.

   “Pa un Arubiano cu a lucha pa su pais, e desaroyonan aki ta sumamente preocupante,”a bini dilanti den combersacionnan cu a wordo hiba.

Ta wordo papia di un abuso contra comunidad cu ta wordo perhudica pa actonan criminal pero tambe di e forma con ta trapa riba e realidad di e proceso democratico cu ta conduci na gobernacion propio di Aruba.

   “Status Aparte tabata un lucha pa e Arubiano cu a uza expresionnan di maximo balor pa un Pueblo den e lucha pa autonomia cu mester a haci posibel pa Aruba tin su propio gobernantenan y representantenan di Pueblo,”a wordo mustra.

  Con sagrado e lucha tabata, a wordo ilustra pa e slogan “Vox Populi, Vox Dei”cu ta nifica cu Voz di Pueblo ta Voz di Dios.

   Esaki tabata e exigencia pa representacion y gobernacion propio di Aruba, cu ta exigi gobernantenan y politiconan cu ta duna balor na e normanan halto cu tabata parti di e lucha Arubano.

   Atrobe a wordo mustra na DIARIO, cu Parlamento mester haci su trabou di control y asina duna prueba na Pueblo cu e ta controla tur loke ta pasa cu propiedad di Pueblo, pa ta tur loke e pais ta representa y produci.

E proceso democratico y su bon funcionamento na interes di Pueblo, ta depende di e contenido cu partidonan ta duna y e momento a yega pa partidonan tambe cuminsa exigi di candidatonan pa nan abstene di tur forma di corupcion y habri porta, pa mescos cu ta pasa den seno comercial, e partido mes por inicia proceso legal contra personanan cu ta abusa di e confiansa di Pueblo pa medio di abuso di e proceso democratico di e pais.

Reaccionnan cu DIARIO a ricibi, ta indica cu tin hopi atencion pa e resultadonan di e proceso legal contra ex Ministro Plenipotenciario Besaril, cu actualmente ta bou investigacion di autoridad y den detencion segun informacionnan te na momento di ciere di e edicion aki di DIARIO.

Si ta berdad cu e puesto di Ministro Plenipotenciario a wordo usa pa actonan di corupcion, esaki lo mishi sigur cu e bon imagen di Aruba den Reino, na un momento sumamente importante.

Manera a wordo presenta na DIARIO, e desaroyonan politico na Hulanda, mas y mas ta sostene nacionalismo politico na Hulanda. Esaki ta haci cu Aruba awor mester defende mas cu nunca su bon gobernacion na tur nivel.

E esfuerzonan grandi cu a wordo haci pa Aruba pa por a yega na solucion di problemanan serio, a entrega na Aruba un posicion sumamente importante den Reino, cu ta exigi pa Aruba hiba un maneho intachabel.

E forma cu Gobierno Evelyn Wever-Croes a distancia su mes di e trabou di Husticia, ta wordo aplaudi.

Na mes momento e urgencia pa Parlamento atende cu actonan abusivo di e sistema electoral, a bira mas grandi.

Pregunta ta wordo haci entorno pasonan pa prome cu eleccion 2025, cera porta di Parlamento pa personanan condena na prison dor di Huez.

“Parlamento mester evita abuso, accionnan ilegal manera corupcion den e representacion y gobernacion di e pais. Esaki ta exigi cu Parlamento ta cera porta pa tur conducta politico, cu no ta respeta ley, cu ta base di democracia,”informantenan a indica.

Pa Voz di Pueblo por ta Voz di Dios, mester cera porta pa tur loke ta kibra e leynan den cual e voz di criminalidad ta resona, manera informantenan a indica.

DIARIO ta en busca di mas informacion di expertonan cu na e momentonan aki ta indaga den ley, cu na nan parecer mester refleha e forma cu democracia ta realidad na Aruba.

Crimen cu ta wordo comete dor di personanan cu ta representa Pueblo den Gobierno of Parlamento, mester wordo persigui tambe dor di partidonan politico na cual nan ta participa y cu nan a usa pues como nan vehiculo, pa nan comete crimen contra e pais y su Pueblo.