DCHA cu bishita productivo na Horacio Oduber Hospital

The content originally appeared on: Diario

Dutch Caribbean Hospital Alliance trahando riba acuerdonan di cooperacion

ORANJESTAD (AAN):  Riba dia 21 y 22 di juni directornan di hospitalnan di Caribe Hulandes a bishita Horacio Oduber Hospital. Den cuadro di e cooperacion den region a combersa mas di cerca tocante e importancia pa loke ta formacion di dokter y enfermeranan specialisa, acomodacion durante calamidad y reduci e cantidad di transferencia di pashent pa paisnan pafo di Reino Hulandes.

            Horacio Oduber Hospital ya ta cumpli un funcion importante pa pashent di Bonaire, pero durante e olanan di Covid tambe a acomoda pashentnan di Corsou y despues di e horcan Irma tambe a trata hopi pashent di Sint Maarten.

            Tambe e otro hospitalnan den region a duna nan aporte y sosten pa e islanan rond di nan. Dos aña pasa a surgi e idea pa inicia un aliansa formal di hospitalnan pa actua miho den e cuido regular. Durante e siguiente dianan e instalacion formal di Dutch Caribbean Hospital Alliance lo ser efectua.  

            Despues di e bishita y combersacionnan tur director a sigui na mesa cu e gobiernonan y seguronan di cuido di e islanan, incluso Hulanda. Diabierna awo esaki lo conduci na proyectonan cla pa ehecuta, sosten y acuerdonan di fondo y personal door di e ministernan encarga cu cuido na Aruba, Corsou, Sint Maarten y e secretario di estado di Salud, Bienestar y Deporte pa Bonaire, Saba y Sint Eustatius.

            Directornan di e hospitalnan a duna di conoce di ta impresiona di e posibilidad y facilidadnan di HOH. Aruba tin un hospital cu su poblacion por ta orguyoso di dje.