Danki na tips famia a localiza e mucha muher perdi

The content originally appeared on: Diario

Famia a entrega e homber na Polis

ORANJESTAD (AAN): Famianan ta hopi contento cu tips cu a drenta, pa asina nan por a actua y haya nan yiu muher bek.  Y esey no ta tur, pasobra e homber cu tabatin e criatura scondi, awor ta den man di Polis.

   Manera DIARIO a trece dilanti caba den su edicion di Dialuna, nan a haci un suplica na comunidad cu por a mira nan yiu muher, pa notifica nan mesora, of yama Polis.

   Famia a haci e raportahe di hende perdi na Cuerpo Policial di Aruba, y despues a acerca prensa pa pidi yudanza di pueblo pa yuda localiza e hoben Carolina di 15 aña aki, kende a sali bay sin permiso for di cas.  Carolina tabatin un jacket roos manga largo bisti.  E tabatin keds blanco na pia. Famianan a bisa cu Carolina a sali for di cas, drenta un auto color cora cu un homber na stuur, y a bay.

   Tata di e hoben tambe tabata buscando rond activamente non-stop, y no a preocupa su soño mes.  El a bin haya su yiu Carolina danki na Tips, y el a pasa e homber cu a bay cune pa Polis atende cune.

   E tata awor ta manda un palabra di gradicimento na tur ciudadano cu a yude, y a sostene nan pa e caso aki.

   Tin di corda tur hende, cu Ley di Aruba ta castiga tambe esnan cu intencionalmente tin un mucha muher menor di edad scondi, pues e consecuencia por ta pisa pa abo cu lo por tin e mucha muher.