Dangui Oduber: e logronan di un trahador silencioso!

The content originally appeared on: Diario

Den tempo di Carnaval un analisis di trabounan tras di cortina

*Jacco Vroegop tabata e remedi cu a scapa Hospital di Aruba?

*Musica di piano caminda hasta yobida tabata problema grandi 

ORANJESTAD(AAN)—Hende, pues incluso nos mes, tin e tendencia pa dedica atencion na loke ta bay malo.

Den trabou di prensa, esaki realmente ta uno di e problemanan grandi pasobra (si kier admiti of no) sensacion y bati bleki ta keda un atraccion grandi pa hende.

Na mes momento e cantidad di asuntonan cu ta bay completamente robez na mundo, ta asina halto, cu ora un periodista subi cama, e tin miedo pa e no wordo spierta pasobra Guera Mundial a cuminsa.

Den tur e problemanan cu ta rementa na mundo, Aruba tin un bendicion special pasobra tur dia ta presenta logronan nobo realisa pa Gobierno di Aruba.

Pa un proclama algo, e mester bini cu prueba, cu den caso di Ministro Dangui Oduber, por ehempel, tin na cantidad.

Pakico tanto logro historico gubernamental di Aruba ta keda den silencio y no ta sirbi di inspiracion pa hobennan Arubano, cu mester haya inspiracion den e sosten cu loke ta bon ta haya na un pais?

Esaki ta loke nos a puntra nos mes pa por atende cu e reto grandi di prensa, pa duna animo na un Pueblo, recompensando loke ta bon y no keda pega den loke ta robez.

Con turismo na Aruba ta florece y hasta ta papia di falta di personal, mientras falta di empleo ta e problema mundial grandi actualmente, ta entrega prueba di loke Ministro Dangui Oduber a logra.

Sinembargo, e prueba mas grandi di e tremendo trabou cu el a realisa como gobernante, ta sconde den Hospital Horacio Oduber di Aruba, cu na momento cu el a bira obheto di preocupacion di Dangui Oduber na un forma special, hasta tabata motibo pa panico den temporada di yobida.

For di e momento cu nubia forma riba cabez di Aruba, hospital tabata na careda pasobra tabata tin yobida den hospital tambe.

Asbest a kima y Aruba na careda. Desaster tras desaster centraliza den e herencia cu a costa Aruba tanto Miyon como plannan di e intento di gobernacion di Gobierno Mike Eman, cu a produci un adorno di debe di 1.6 Biyon pa situacion financiero di Aruba.

Den un situacion di calamidad, Ministro Dangui Oduber a presenta na Aruba, e persona di Yacco Vroegop.

Nos mes a lansa e pregunta si e dirigente di Hospital a spierta na tempo pa realisa e seriedad di loke lo a bira su trabou.

Awe ora papia di logro mester papia di Hospital di Aruba, caminda hasta musica di piano ta resona awor cu Cuido Medico mundialmente, ta enfrenta reto enorme cu e resultadonan di e Pandemia Covid-19 pero tambe e problemanan serio  cu mundo ta enfrenta den e situacion di recesion na momento cu Cuido Medico mester di inversionnan constante pa scapa bida.

Kico e maneho di Dangui Oduber a haci pa Turismo di Aruba, ta conoce.

Kico ta e maneho excelente na hospital ta bini dilanti den e temporada di Carnaval, durante cual Aruba yena cu turista, por ta trankil pasobra e tin un Hospital cu por atende cu e su responsabilidad pa cuido interno di pashentnan den tur situacion.

Mientras alegria ta yena cayanan di Aruba na caminda di Carnaval, DIARIO lo sigui honra e trahadornan silencioso y ehemplar di Aruba y awe ta habri e serie di informacionnan cu loke sin duda merece e prome lugar cu ta e logro grandi cu por nota ora papia di Hospital di Aruba, a base di maneho cu a wordo hiba dor di staff y personal, cu merece un aplauso pa nan trabou den silencio!

Te awor Yacco Vroegop a duna tur indicacion cu e tabata e remedi cu Hospital di Aruba tabata tin mester bou e maneho gubernamental di Ministro Dangui Oduber, parti di uno di e mihor gobiernonan cu Aruba a conoce, y bou maneho di Yacco Vroegop y tur miembro di personal di Hospital!