Cuatro aña di prison pa mama cu a abusa di su dos yiunan menor di edad

The content originally appeared on: Diario

Huez a confirma exigencia di Fiscal

ORANJESTAD (AAN): Diabierna mainta via video conference, Hues a condena e dama R. di 58 aña di edad, na castigo di 4 aña di prison pa a abusa di su dos yiunan menor di edad.

   Den sala di Corte tabata presente Hues, Fiscal, abogado y e tata di e muchanan. Na KIA, den un oficina, tabata e acusado R. pa e scucha su sentencia.

   Algun siman pasa tratamento di e caso a tuma lugar caminda R. ta worde acusa cu entre Augustus 2011 te cu 2017, el a abusa di su dos yiunan, un homber 12 aña y un muher 13 aña. Subsidiario R. ta worde acusa di a haci acctonan inmoral cu su dos yiunan.

   Fiscal a exigi 4 aña di prison: Na opinion di Fiscal e forma con e muchanan a describi kico e mama tabata haci nan y nan mester a haci cu otro, esaki no por worde considera abuso. El a bisa cu mester tin un forma di penetracion pa considera esaki como abuso. Fiscal a indica cu e parti fastioso den e caso aki ta, con e muchanan por describi con cosnan a sosode. Pesey, a base di ley, no por prueba cu tabatin abuso.

   Sinembargo aki por papia di actonan inmoral y e forma con esakinan a sosode, por considera esaki como abuso. E hecho cu e muchanan, bou presion di e mama, nan mester haci actonan inmoral, por considera esaki mescos cu ta penetracion. Fiscal ta haya cu R. ta culpable. Pa cu e castigo, Fiscal a bisa cu hechonan asina por afecta e muchanan pa hopi tempo. Esaki por manifesta ora e muchanan a bira adulto.

   Fiscal a mustra cu Hof su punto di salida ta 3 aña di prison pa abuso sexual di mucha. E parti cu ta haci e castigo mas pisa, ta ora cu ta forza e muchanan haci actonan inmoral. Aki ta papia di abuso di dos yiu den un periodo largo. Fiscal a exigi 4 aña di prison pa R.

   Sentencia: Diabierna mainta Hues a bisa cu, mescos cu Fiscal, e no ta haya proba cu tabatin penetracion sexual cu e muchanan. Hues si ta haya proba e acusacion subsidiario, esta cu R. entre 2012 y 2017 a haci actonan inmoral cu su dos yiunan.

   Hues a bisa cu e ta haya e declaracion di e muchanan ta consistente. E ta confia e declaracion di e muchanan. E hecho cu e muchanan no a ripara cu e mama tin cicatriz na su barica parti abao, no ta mustra cu tin cu desconfia di e declaracion di e muchanan. E ta haya cu tin dos declaracion cu ta sirbi pa pruebanan di sosten.

   E muchanan a mira kico nan mama a haci cu nan. Hues a bisa cu e mucha homber tabata pupu y pishi den su carson na school. Esaki ta su reaccion ora e pensa cu e tin cu bay cas pa haci cosnan inmoral cu su ruman muher y su mama.

Hues a remarca cu un mama cu ta laga su yiunan chikito haci actonan inmoral cu otro y cun’e, ta un asunto hopi serio. Esaki por afecta e muchanan den futuro. E ta haya cu e mama, R., no a tene cuenta cu esey. Pa cu e castigo, Hues a tene cuenta cu psycologo ta haya R. responsabel pa su actonan.

   Hues a bisa cu e ta haya e exigencia di Fiscal na su lugar y ta confirma esaki. Hues a condena R. na 4 aña di prison, kitando e tempo cu e ta sera den KIA.