Cuanto Miembro di Parlamento Aruba mester?

The content originally appeared on: Diario

E asunto mas crucial den desaroyo politico na Aruba ta wordo lubida — Pakico 21 politico pa controla gobernacion di comunidad di 110.000? —150 Miembro Parlamento y 75 Senador pa 17.44 Miyon Hulandes

ORANJESTAD (AAN) – Mundo politico ta sumamente fascinante. Ora revisa historia politico di cualkier pais, ta topa cu baritanan magico scondi, cu ta parce di a deshaci di asuntonan sumamente interesante y importante cu hasta tabata decisivo pa e desaroyonan mas importante na e pais.

Uno di e temanan mas importante di momento ta, con ta pone e situacion financiero di Aruba den un cuadro cu ta basa riba realidad di e pais y e placa cu Aruba tin pa cubri su gastonan.

Na varios ocasion nos a yega di duna un indicacion, cu mundo politico ta keda mundo politico, un mundo cu cierto magia y posibilidad di crecemento personal den servicio di Pueblo na un escala unico.

Nos tema di awe ta deshaci di e palet di color politico, pa directamente nos por cuestiona uno di e gastonan mas grandi di Pueblo di Aruba, cu ta gobernacion di Aruba pa loke ta trata e poder ehecutivo y e poder legislativo. Nos no ta mishi cu Husticia, pasobra gastonan di Husticia pa e pais, tin splicacion.

Gastonan di gobernacion di Aruba, no tin splicacion ora bay na raiz di e sistema politico, cu ta fundeshi di democracia na e pais.

Nos pregunta ta directo y lo ta maraviyoso si hunto cu henter Aruba porfin nos haya contesta pa e pregunta, pakico Aruba mester di un Parlamento di 21 persona pa controla gobierno pa Pueblo.

Pakico un pais cu 110.000 habitante, mester di 21 persona cu ta wordo paga pa un bez den tanto aña skirbi un ley; controla kico gobernantenan ta haci cu placa di Pueblo si nan kier controla y supuestamente defende interes di e pais, segun nan opinion y preferencia.

Pakico 21 persona pa representa y traha pa 110 Mil ciudadano di Aruba, cu ta paga expertonan pa yuda nan haci nan trabou y tin un Algemene Rekenkamer Aruba  y un Raad van Advies pa splica nan con y kico controla?

Pakico 21 persona mester wordo paga pa bini hunto, reuni pa dianan y horanan largo mientras por ehempel 1.6 Biyon ta core bay riba cabay di San Nicolas.

Unda den historia di Aruba ta keda proba cu Aruba mester di 21 politico pa representa y defende su interes?

Ora bolbe den historia di Aruba, e cantidad di Miembro di Parlamento pa Aruba ta bini dilanti den e cantidad di miembro cu Aruba tabata tin mester pa evita cu Willemstad ta dicidi pa Oranjestad cu un Parlamento di 12 pa Willemstad y 8 pa Aruba, cu ta e formula traicionero cu a causa e lucha di Betico Croes pa Status Aparte.

E cifra 21 ningun caminda ta bini dilanti como necesidad pa bon funcionamento di un Parlamento y simplemente a pasa di e cantidad di Conseho Insular.

E pregunta awe ta keda, si mester di 21 miembro di Parlamento pa un pais cu 110 Mil habitante y su por hustifica esaki ora compara e cantidad di representantenan di Pueblo cu e realidad na otro paisnan den Reino.

Hulanda cu un poblacion di 17.44 Miyon persona, conoce 150 Miembro di Parlamento (Tweede Kamer) y 75 Senador.

Tweede Kamer ta traha ley y ta controla Gobierno, manera Parlamento di Aruba mester haci.

Den Eerste Kamer ta atende cu proposicionnan di Ley cu Tweede Kamer a aproba. Eerste Kamer poco bez ta haci uzo di su derecho pa controla Gobierno.

Aruba tin 9 Ministro, incluso Prome Ministro, pero tambe un Ministro Plenipotenciario na Hulanda y uno na Merca.

Hulanda tin 20 Ministro y 9 Secretario di Estado.

Awe na un forma franco, nos ta pone un realidad na discusion. Ora presenta cifranan, e pregunta cu ta keda ta si Aruba por carga e peso di su Parlamento, cu un cifra cu a nace tempo cu Miembronan di Parlamento tabata haya un compensacion pa nan trabou. Despues a introduci Miembro di Parlamento “full time”, cu ta incontrolabel.

E presupuestonan di Parlamento ta papia pa nan mes. E gastonan enorme cu mester wordo paga dor di un Pueblo na e mundo politico, e mundo cu ta dicidi finalmente con ta gasta placa di Pueblo.

Con bon a controla, ta keda como tema pa otro articulo ora papia di corupcion y abuso di placa di Pueblo, di cual Ministerio Publico por duna prueba!