Cu e aprobacion di LNT por duna e ambtenaarnan parti di nan salario bek

The content originally appeared on: Diario

Parlamentario Alvin Molina (MEP):

ORANJESTAD (AAN): No ta un secreto cu e pandemia di COVID-19 a haci e situacion financiero di pais Aruba mas dificil y cu pa e motibo ey nos mester a bay bati na porta di Hulanda. Tampoco ta desconoci cu Hulanda a brinda nos ayudo y e ayudo aki ta bini cu un lista largo di condicionnan, di cual un di e condicionnan aki ta encera introduci e Landsverordening Normering Topinkomens (LNT). Ultimo Hulanda a pone e mes un condicion aki pa paga e ambtenaarnan parti di nan entrada back, esta 5%.

   Nos ambtenaarnan tin mas cu 2 aña caba entregando 12.6% di nan entrada pa duna un sosten na esnan cu a perde nan trabao y cu despues a bira un condicion di Hulanda pa Aruba ricibi sosten di likides. Danki na e bon maneho di Gabinete Wever-Croes I y II, e efecto di e pandemia ta bahando, nos economia poco poco ta recuperando, hopi cu a perde trabao a haya trabao back, algun di nan a logra bay back na ricibi full salario… pero keto bay e ambtenaarnan ta entregando 12.6%.

   Fraccion di MEP entre otro mi persona a acerca Gobierno na varios ocasion pa pidi un update pa cu e paro di e recorte aki. Gobierno na su turno pa basta tempo ta negociando cu Hulanda pa logra duna nos ambtenaarnan nan entrada 100% back. Gobierno di Aruba a presupuesta e 5% di pago di salario di ambtenaarnan den Presupuesto di Aruba 2022 di cual nos Fraccion a aproba. Awo porfin a presenta e oportunidad pa ambtenaarnan haya un parti di nan salario back. Pero pa Gobierno di Aruba por logra duna nos ambtenaren nan 5% back Hulanda ta exigi pa Aruba pasa e LNT. Awor esaki no ta un ley cu nos por a pasa 1,2,3. Sigur, pasa ley di e peso aki ta rekeri tempo, cautela, informacion y bon comunicacion cu stakeholders. Pa es motibo aki mes Fraccion di MEP a sinta cu stakeholders, a haci pregunta, pidi documento y cifra y a haci comparacion di e ley aki cu esnan cu ya ta vigente den Reino Hulandes pa por haya un mihor bista di kico e ley aki lo nifica pa nos profesionalnan.

   E ta logico cu niun hende gusta pa bin un reduccion den nan salario. Pesey, e puntonan di e LNT cu a merece di worde discuti ta e haltura di e norma maximo, e periodo di transicion y cua entidadnan ta cay bou di e norma maximo aki. Un punto cu sigur tambe nos a tene cuenta cune ta cuanto hende lo worde afecta door di introduci e Wever-Croes norm. Di parti di Fraccion di MEP nos a percura pa splica sindicatonan cu e ley aki ta dirigi specificamente na e topfunctionarissen y no na ful e personal.

  Pa nos di Fraccion MEP e ta importante cu nos no ta bay haya nos cu un ‘trickle-down effect’, unda cu paso e topfunctionaris ta gana menos tur otro persona automaticamente ta bay gana menos. Mirando tur e preocupacionnan di parti stakeholders nos Fraccion a entrega 1 amienda y 3 mocion durante e tratamento di e LNT pa asina hisa e norma maximo, amplia e periodo di transicion y trece trankilidad den e entidadnan. Esaki a encera entre otro, cu durante e prome 2 aña di tempo mester monitorea y investiga ki efecto e norma maximo tin riba e empleadonan di entidadnan publico y semi-publico. E aprobacion di e LNT tabata necesario y e siguiente 2 añanan investigacionnan lo bay tuma lugar na bienestar di e entidadnan.