Cruz Cora Aruba tambe ta cla pa yuda e refugiadonan di Ukraine

The content originally appeared on: Diario

ORANJESTAD (AAN):  Cu e situacion humanitario cu ta deteriora rapidamente na Ukraine y paisnan bisiña, Comision Internacional di Cruz Cora (ICRC) y Federacion Internacional di Cruz Cora (IFRC)

tin miedo cu miyones di persona lo enfrenta temponan hopi duro y lo sufri sin acceso na asistencia humanitario.  Pa responde na e necesidad masivo aki, e dos organizacionnan ta haci un suplica hunto pa 250 miyon Swiss Francs ($ 272 miyon). Esaki pa duna e asistencia cu tin mester.

   Den e proximo simannan, ICRC lo aumenta trabaonan pa reuni famianan cu a worde separa pa e guera, lo provee cuminda y otro articulonan di cas.  Cruz Cora tin un hotline na Ukraine y aki hendenan ta pidi ayudo desespera. Pa responde na e emergencia grandi aki, teams di Cruz Cora  mester por opera di un manera sigur pa yega na e personanan aki. Tambe mester percura pa curpa di defuntonan worde trata cu dignidad.

   Trucks di awa ta yega cerca pa suministra awa y mester aumenta esaki. Tambe mester duna sosten na facilidadnan medico y yuda cu ekipo y material di trabao pa yuda tur cu ta herida. Federacion Internacional di Cruz Cora ta enfoca su mes na yuda esunnan mas vulnerabel, incluyendo mucha cu no ta acompaña pa un adulto, mama soltero cu yiu, adultonan mayor y persona cu limitacion. Lo inverti hopi den aumenta capacidad di e team di Cruz Cora den Ukraina y paisnan cerca pa reenforza accion humanitario.

   Ya caba a mobiliza miles di voluntario y staff cu ta dunando asistencia cu shelter, articulonan basico di cuido, productonan medico, salud mental y sosten psico-social pero tambe cu “cash assistance” na mas hende posibel. Cruz Cora Aruba ta uni su mes na e suplica di ICRC y IFRC, pesey awe ta pone su cuenta di banco di emergencia disponibel pa esun cu kier haci un donacion monetario.  Fondonan ricibi riba e cuenta aki, ta worde transferi pa Federacion Internacional di Cruz Cora pa yuda cu e operacion enorme aki. E situacion ta empeora cada ora y tur ayudo ta importante.

Red Cross Aruba

Aruba Bank # 0384010790