Crisis petrolero ta impacta Acuerdo entre Aruba y Hulanda!

The content originally appeared on: Diario

Hulanda ta participante Guera Ukraine y Euro ta perde balor — *Reino y Aruba a firma acuerdo prome cu impacto mundial fatal — *Ciudadanonan tur pais den Reino victima di Guera na Ukraine

ORANJESTAD(AAN)—Con Hulanda y Aruba por yega cerca otro den e situacion actual? Kico e combersacion entre Prome Ministro di Aruba y Secretario di Estado Hulandes pa relacionnan den Reino mester produci e siman aki?

E Acuerdo entre Hulanda y e paisnan Hulandes den Caribe por wordo honra sin ningun adaptacion?

DIARIO a bay investiga kico por spera e siman aki den desaroyonan sumamente interesante cu Reino a conoce durante ultimo decada.

Na 2010 ora Antia Hulandes a stop di existi, Hulanda a duna asistencia pa nan forma nan futuro como pais mientras Hulanda a acepta e responsabilidad directo pa e islanan Bonaire, Saba y Sint Eustatius cu a bira gemeente di Hulanda.

Na 2010, manera DIARIO a relata, Aruba tambe a subi lama financiero peligroso cu e reduccion di 50 porciento (mitar) BBO, cu hunto cu e proyectonan di PPP a hinca Aruba den formacion di debe peligroso.

Escandalo grandi cu a haci cu hasta e prome Ministro Presidente di Curacao a resulta den prison, a cuminsa den e periodo, cu Hulanda mester a impone supervision na Aruba y mustra a duna aanwijzing pa e presupuesto cu a wordo prepara dor di Gabinete Mike Eman.

Sint Maarten tambe a produci su problemanan.

Reino Hulandes a haya su mes den un situacion cu Hulanda mester a atende cu gobiernonan di tur e tres islanan loke a conduci na supervision cu a evita un desaster financiero mucho mas grandi cu a wordo produci di 2010 pa 2020 ora Covid-19 a bati na porta.

No Aruba so, pero e tur e tres paisnan Hulandes den Caribe, tabata ya den un situacion pesimo cu a haci cu Hulanda ya na 2014 pues mester a drenta den accion.

Aanwijzing a subi mesa hunto cu supervision financiero pero economia a sufri tambe.

For di 2014 Aruba cu tambe tabata den situacion pesimo, a wordo confronta cu un pakete di medida cu Gobierno Mike Eman mester a tuma manera Reino a ordena.

Na Aruba Gobierno Mike Eman a presenta e proyecto di Citgo como gran salbador di Aruba y hasta a duna fecha pa su apertura, aunke tabata conoci cu e proyecto for di 2017 tabata na peliger serio.

Durante 2016 y 2017 tur instancia tabata en espera di Citgo cu mester a habri na 2018 pa yena caha di placa di Aruba, loke a stroba otro desaroyo economico y mas medida financiero.

Na 2020 tur isla Hulandes den Caribe mester a presta placa di Hulanda pa motibo di Covid-19. E situacionnan den Reino incluso na Aruba for di 2010, a causa cu Reino a dicidi pa un pakete cu mester a evita cualkier wega politico cu placa manera a pasa na Aruba for di 2010 pa 2014 ora Hulanda a interveni.

Esaki a conduci na e pakete di medidanan cu ta inclui COHO, cu segun Hulanda mester a balansa e debenan grandi cu mester a refinancia pa Aruba por a sigui cana.

COHO ta pasa riba reforma, cu segun e pensamento basico na mesa di negociacion, mester haci cu Aruba tin un maneho financiero den cual debe y gasto ta den balansa.

E pensamento tabata, cu pa e paisnan Hulandes den Caribe asina para financieramente riba nan propio pia.

Corta gasto di Gobierno y aumenta entrada mester habri un futuro nobo riba cual tabata traha ora Guera di Ukraine a cuminsa cu resultadonan directo pa prijs di petroleo na mundo.

Mientras Gobierno ta tuma medida y entre otro mester baha gastonan di Gobierno, inflacion ta subi gasto di ciudadanonan y gobiernonan na tur pais di Reino incluso Hulanda, cu mester duna asistencia directo na guera na Ukraine, acomoda refugiadonan di Ukraine y atende cu Euro cu a perde su balor mientras costo di bida ta subi.

Na e paisnan Hulandes den Caribe, e aumento di prijs di petroleo a subi costo di bida na momento cu mester tuma medida pa entradanan di e paisnan cubri nan gastonan.

E acuerdo a wordo firma prome cu guera a haya su inicio loke ta haci cu politiconan no a tene cuenta cu e forma cu inflacion, aumento di costo di bida lo a afecta ciudadanonan di e paisnan directamente.

Informantenan a indica cu esaki ta e problema grandi cu politiconan conoce actualmente den Reino.

Kico e situacion mundial ta haci directamente cu e ciudadano y con ta impone medida cu COHO ta exigi.

Un siman sumamente interesante ta spera Reino Hulandes cu a firma un Acuerdo basa riba e resultadonan di Pandemia di 2020 sin por a mira e reto financiero cu Guera di Ukraine lo a presenta pa henter mundo na 2022.