Crisis mundial di containernan a bira un menasa pa e abastecimento di hospitalnan

The content originally appeared on: Diario

Hopi hospital den e region ta importa remedi for di India — *Mayoria di remedi na Aruba ta bin for di Hulanda


ORANJESTAD (AAN):  E tema aki ta uno cu no lo caba pa awor. E problematica relaciona cu e crisis mundial di containernan ta menasa e abastecimento di e hospitalnan cu ta depende di remedinan y materianan prima proveniente di exterior pa nan operacion.

Aunke parce cu ainda tin paisnan cu no a raporta retrasonan cu ta afecta e continuidad di e servicionan, tin algun institucion caba cu a anuncia medidanan caba pa minimisa e impacto di e crisis den e atencion di e personanan.

Por ehempel, tin paisnan cu ta cumpra remedinan for di India cual ta e pais di origen di produccion. Otronan ta haya nan remedinan for di Francia, Alemania y China. Un porcentahe di remedinan ta rekeri materia prima procedente di Asia.

Algun hospital a opta pa pone den practica strategianan cu ta consisti den revisa e entrega di remedinan y materia prima na un plazo di 6 luna pa asina mitiga e impacto y tuma medidanan di forma anticipa.

Cu esaki por monitorea e situacion cu e proveedornan pa detecta posibel retrasonan, y revisa e disponibilidad di e medicamentonan y e materia prima distribui den e red y di esunnan cu ta den bodega den caso cu mester moviliza productonan entre hospitalnan. Sinembargo, e posibilidad di retrasonan ta inminente.

E caida den e disponibilidad di containernan durante e ultimo lunanan a provoca un incremento den e prijs di e containernan nobo y den e tarifanan di huur y fletenan.

E costo di transporte di Asia pa America pa container a pasa di aproximadamente $2.000 na inicio di 2020 te na a $10.000, incluso mas, na October pasa. Parce cu esaki ta representa un incremento di 400%.

E incremento constant aki den e costo di flete maritimo ta dispara e prijsnan di bienes, principalmente di esunnan importa, y den e costo di e materianan prima, materialnan di envase y empake y otronan rekeri pa e produccion.

Na September ultimo, e flete maritimo promedio anual di un container a alcansa $11.000, locual ta ‘un locura’ si ta compara cu e costo promedio di $3.450, na januari pasa. 

Na Aruba, hopi di e remedinan cu ta wordo usa na Hospital ta wordo importa for di Hulanda, asina Minister di Salud Dangui Oduber a duna di conoce algun luna pasa. Pesey, den e caso aki, no por pensa riba un crisis asina na Aruba mirando cu ta usa transporte aereo (avion) pa transporta remedinan, entre nan e vacunanan di Covid-19.

DIARIO tambe a tuma contacto cu algun botica y a haya confirmacion cu nan ta haya mayoria di remedi for di Hulanda y otronan di Merca. Te cu awor no a confronta problema cu abastecimento, pero esaki ta solamente e agencianan cu ta importa e remedinan for di e companianan farmaceutico lo por indica si a haya algun inconveniente relaciona cu e importacion.

DIARIO lo sigui di cerca e desaroyo aki.