Creacion di un economia artificial ta drenta historia

The content originally appeared on: Diario

Dos experto financiero mester a scapa Florin di Aruba na 2020 — *Nan a crea futuro na 2020 ora mester a declara Aruba bancarota  —  *Ministronan Wever-Croes y Maduro a evita desaster social


ORANJESTAD(AAN)—Manera DIARIO a anticipa basta dia pasa, e situacion den cual mundo ta acerca final di 2021, no ta nada facil.

Ora analisa desaroyonan na e paisnan mas importante pa Aruba cu ta sigur Estados Unidos y Hulanda, ta topa cu informacionnan preocupante sigur a base di e desaroyonan entorno Covid-19 pero tambe como refleho di mundo total, cu ta parce di a perde cabez.

Aruba a drenta un fase sumamente importante cu mester conduci na un normalidad, cu te ainda ta wordo malinterpreta dor di demasiado hende.

Pa comprende e berdad di gobernacion di Aruba y analisa kico lo mester pasa, mester bolbe un rato na e momento cu na 2020 Aruba a pidi tur turista bandona e pais, a bisa tur ciudadano pa keda cas y no bay traha mas cu excepcion di loke tabata sumamente necesario, a cera school y a paralisa comunidad.

Esaki tabata loke a bira conoci como “lock down”. Prome Ministro Evelyn Wever-Croes como Prome Ministro, mester a tuma e decision pa paralisa economia mientras e pais tabata prepara su mes pa por a atende cu e malesa mortal Covid-19.

Prome Ministro Wever-Croes na e momento a deshaci di e trabou di comercio liber pa produci placa pa economia funciona, loke ta haci cu tur empresa (cu excepcion di e empresanan y instancianan vital) mester a cera nan porta y no tabata tin entrada mas.

E circulo di entrada y gasto di Aruba a wordo paralisa, loke a haci cu realmente e gran mayoria di empresa y servicionan di Gobierno mes, a perde entrada y no por a paga trahadornan cu lo a keda sin entrada, sin placa pa paga nan gastonan (sin cuminda).

Na e momento Prome Ministro Wever-Croes, respalda pa Ministro di Asuntonan Financiero y Economico Xiomara Maduro, mester a bini cu un solucion pa Aruba y Arubianonan sobrevivi sin entrada real.

Na e momento cu Aruba a cera porta pa turismo, Aruba mester a declara su mes bancarota si e tabata un empresa.

No solamente Aruba tabata sin placa, pero e Aruba cu Prome Ministro Wever-Croes a hereda, tabata sin reserva y sin placa pues den e caha di placa di Aruba, cu Wever-Croes a hereda bashi rondona cu debe, for di Gobierno Mike Eman.

Algo historico a pasa na 2020.

Prome Ministro Evelyn Wever-Croes a asumi e responsabilidad di comercio pa entrega placa na trahadornan y asina a haci posibel pa negoshinan cu a keda sin entrada di e pilar economico di turismo y otro servicionan mundial paralisa, por a siguia paga trahadornan cu asina no mester a bay solicita pa nan bancarato pasobra nan no tabata tin placa mas.

Dos lider Evelyn Wever-Croes y Xiomara Maduro, na un forma artificial, a tene comercio local na bida contra reglanan normal di gobernacion.

Leynan importante a mira luz y ta vigente pa cierto termino, cu awor ta termina y ta exigi Aruba drenta bida normal.

Yudansa Hulandes tabata clave den e situacion aki, pero sigur e capacidad di Gobierno cu mester a evita un desaster social na 2020 pero tambe morto di Florin Arubano, cu tambe mester a wordo proteha cu medidanan special bancario.

Aruba no por mantene e situacion actual. Produccion mester reemplasa e medidanan special cu Gobierno Wever-Croes mester a tuma.

Produccion, cu ta wordo afecta si trahadornan no por traha loke ta nifica cu tur hende mester yuda evita cu Covid-19 ta bolbe plama manera ta pasa na Hulanda actualmente.

Ora analisa e realidad di awe, ta mira debe nacional di 2017 aumenta pa debenan cu mester a haci na 2021 pa scapa di pandemia.

Ora analisa e realida di awe, ta mira un mundo den gara di cambio di clima cu ta pone hende lomba contra muraya y exigencianan pa introduccion di plantanan di petroleo mas limpi, produccion di energia limpi, pero cu tambe ta nifica mas problema cu productornan di petroleo cu ta hisa prijs.

Pueblo mester yuda pa mantene empleo. Esaki ta nifica, evita cu turismo ta sufri na man di medidanan internacional contra Covid-19. Evita cu e turistanan ta bira victima di criminalidad. Practica Arubianismo y aporta den metodonan realistico.

Ora analisa tur loke a pasa y ta pasa rond mundo, mester aplaudi e maneho di Gobierno Wever-Croes cu na forma artificial a mantene economia na bida.

Pero finalmente y sigur, Aruba mester hinca rudia y gradici cu Aruba no a conoce e desastrenan social, medico , general cu awe ta causa lagrima y dolor rond mundo.