Covid-19 ta alcansa punto mas dramatico

The content originally appeared on: Diario

Aruba mester di politico honesto y no charlatan golos pa voto — *Mucha y hobennan ta na peliger den un mundo sin placa y recurso — *Oposicion barata mientras malesa y petroleo tin mundo contra muraya


ORANJESTAD (AAN) — Cu prueba den man, DIARIO, continuamente ta pone su lectornan na haltura di e forma cu Covid-19 ta avansa.

Cu prueba den man DIARIO a prepara Aruba pa e crisis financiero mundial cu a rementa na momento cu prijs di petroleo a subi y a subi tur prijs basico na mundo.

Na e momento cu mundo a pensa, cu e lo tin e Covid-19 controla, e malesa ta alcansa su punto mas dramatico y ta ataca den su mayoria, mucha entre 10 y aña mundialmente.

Awe paisnan grandi ta lomba contra muraya pa motibo di Covid-19, cu na Hulanda a conoce un aumento di 45 porciento den un siman.

Ta papia di 77 Mil test positivo den un siman di tempo, loke ta bisa tur cos.

Cantidad di morto ta bolbe aumenta pa comunidadnan cu ta cuminsa introduci atrobe medidanan drastico pa evita cu e malesa ta bolbe plama.

Ta cu hopi preocupacion DIARIO ta sigui tur desaroyo mundial pa por informa Aruba, cu no tin tempo pa wega politico di charlatannan cu a destrui e pais.

Ta cu tristeza DIARIO ta observa politica barata cu ta wordo hunga dor di oposicion den Parlamento cu e Pueblo di Aruba, cu nan a laga den situacion miserabel.

Si awe Aruba no tin tur su placa cu e mester, ta pasobra pa haya voto, a gasta placa di Aruba den fantasia sin concenshi manera a pasa di 2009 pa 2017, ora a Gobierno Mike Eman a skirbi e historia politico mas tristo den historia di Aruba.

Aruba tin motibo pa preocupa.

Informacionnan mundial ta duna prueba con Covid-19 ta alcansa su punto mas dramatico y ta pone Aruba cu ta depende di turismo y di economia mundial, den un situacion sumamente peligroso.

Den e situacion aki, Gobierno Evelyn Wever-Croes mester tuma medidanan cu mester tuma, si e no kier pa DIARIO pone su gobierno riba mes linea cu Gobierno Mike Eman, cu a destrui Aruba y futuro di Aruba.

Ta bon pa gobernantenan manera Mike Eman cu a abusa di Aruba, comprende cu rio di oro a seca den e situacion cu el a bay laga atras pa no papia mes di tur e escandalonan cu su partido a produci y cu awe ta wordo atende dor di Corte di Husticia y Ministerio Publico.

Na e momento aki atencion di Pueblo no mester ta riba politica barata.

Un situacion alarmante mundo conoce cu trahadornan den cuido agota. Placa cu no ta alcansa. Debenan cu politiconan abusador y ignorante a laga atras.

Mundo ta den un situacion di alarma grandi cu e crisis di petroleo cu ta baha tur entrada y ta hiba mundo na un futuro sumamente dificil.

Un palabra cla DIARIO ta papia awe y ta splica tur politico cu ta biba di placa di Pueblo tambe: placa a caba rond mundo cu ta den crisis y mas crisis.

Un politico responsabel no ta crea ilusion den Pueblo y sigur no na Aruba cu a wordo manca dor di Gobierno Mike Eman. Manera supervision di Hulanda ta duna prueba.

Aruba mester tuma medida pa Covid-19 no bolbe drenta. Aruba no ta sobrevivi otro lockdown pasobra Hulanda no tin placa ni pa Hulanda mes.

Cuanto Arubiano a muri na Colombia pa motibo di e Coronavirus?

Mike Eman a organisa fiesta cu placa di Pueblo. Evelyn Wever-Croes mester haci placa yega. Ademas no ta Evelyn Wever-Croes a inventa con por baha gasto, pero Hulanda cu a baha Mike Eman for di Fort Zoutman.

Tur advertencia di DIARIO na Aruba a resulta berdad incluso e crisis financiero cu lo baha forsa financiero di Aruba y di e Arubiano.

Awe nos ta sigui asumi nos responsabilidad pa informa Aruba na momento cu 2022 ta presenta su mes na horizonte como apertura di un tempo di crisis financiero cu lo exigi pa tur hende y henter comunidad baha gasto, pa por sobrevivi loke tin na caminda!