Corto circuito a ocasiona candela na ImSan

The content originally appeared on: Diario

Tres operacion tabata tumando lugar e momento ey

ORANJESTAD (AAN):  Dialuna mainta, algo pasa di 10, na ImSan (Instituto Medico San Nicolas) a presenta un alarma di candela  riba e salanan di Operacion.

            Director di ImSan, Dr. Joel Rajnherc a ofrece un conferencia di prensa pa asina duna un relato precis di loke a sosode. El a bisa cu e candela no tabata den e salanan di operacion, pero den e camber prome cu esey unda tin e instalacion electrico y di ventilacion pa e salanan di operacion.

            E medico a bisa cu eynan c’un waya di suministro di electricidad grandi cu ta duna electricidad na e mashin cu tin cu ‘dehumidify’ e camber di operacion y cu ta un waya di un voltage hopi halto, el a haci un corto circuito y esey a causa cu e temperatura den e caha ey di e voedingskabel a subi masha hopi y a cuminsa un candela chikito cu hopi huma.

            E huma tabata asina hopi cu a extende den tur e salanan di operacion y e hangnan. Tres operacion tabata tumando lugar na e momento ey, un di wowo, un di barica y un di un tumor.

            E team di ImSan a reacciona corectamente. Nan ta bon getrain pa atende calamidadnan asina siguiendo tur protocol. Asina tur pashent a wordo saca na ora. Apesar cu nan tabata bezig cu e operacion, e pashent di wowo no tabata cla, esun di barica tampoco. E otro pashent si tabata cla caba y tur e sali den bon estado for di e salanan di operacion, Dr. Rajnherc a duna di conoce.

            Door cu tabata tin dos pashent cu mester a wordo opera ainda, a tuma contacto cu directiva di hospital y inmediatamente a ofrece tur cooperacion pa ImSan por a logra sigui cu e operacionnan aki, Rajnherc a splica. Dos operacion a bay bon y un otro ta continua awe diamars.

            Mester bisa si cu tur pashent di ImSan a sali na tempo, pero algun di nan a inhala hopi huma y siete di nan a wordo manda cu ambulans pa Dr. Horacio Oduber Hospital pa wordo revisa. Tur di nan ta den bon condicion.

             E calamidad aki ta masha excepcional, a bisa, y pa casualidad tabata tin e grupo hulandes cu a haci e parti aki di electricidad, prepara pa yega Aruba dialuna atardi pa haci e re-certificacion di e sistema, pero na lugar di haci un re-certificacion nan lo haci un coreccion di e sistema.