Corte a pospone caso di homber cu ta tira su tata mata

The content originally appeared on: Diario

Ainda no a haya psychiater pa evalua e sospechoso

ORANJESTAD (AAN): Diabierna mainta Jason Mathilda di 32 aña a presenta dilanti Hues pa e caso penal cu Ministerio Publico a cuminsa contra dje. Tratamento di e caso no a sigui pasobra ainda no tin un raport di psychiater pa evalua Jason su estado mental. E caso a bolbe worde pospone.

   Tira su tata mata:  E acusacion cu Fiscal a presenta contra Jason ta cu riba 13 December 2021 el a tira su tata E. Mathilda mata.  Tambe e ta worde acusa di posesion di arma. Por a mira den sala di Corte, un familiar di e difunto.

   Caso posponi: Hues a bisa cu e caso tabata pro forma y a dicidi pa laga traha un raport di psychiater. A palabra cu ayera lo trata e caso pero ta resulta cu ainda no a nombra un psychiater. Hues a remarca cu ningun psychiater a pone su mes disponibel.

   Hues a bisa cu tin reunionnan ta tumando lugar pero ainda no tin nada. Esey ta nifica cu atrobe lo mester pospone e caso. Fiscal a propone pa pospone e caso pa dia 14 Juli pa 2or di merdia. E lo ta otro pro-forma, pa mira con leu ta cu e raport di psychiater. Hues a bay di acuerdo cu e proposicion y a pospone e caso pa dia 14 Juli pa 2’or di merdia

.