Contribucion propio di AZV no ta wordo introduci mas

The content originally appeared on: Diario

Minister Dangui Oduber:

ORANJESTAD (AAN) – Minister di Salud y Turismo, señor Dangui Oduber, a duna informacion den conferencia di prensa di Dialuna 1 di Augustus 2022, tocante e temanan “turismo record” y “eigen bijdrage” cu no ta wordo introduci mas. E dignatario a haci enfasis riba e recuperacion di Aruba su Industria turismo, no obstante cu aña 2022 a habri cu 5 mil caso di Omicron.

Minister Dangui Oduber a elabora riba e desaroyo y recuperacion di e industria di turismo, durante e seis prome lunanan di aña 2022.

E mandatario a expresa cu despues di dos aña hopi dificil di pandemia, y obviamente pa gobierno y pa Ministerio di Turismo, e enfoke ta e recuperacion di Aruba su turismo, cu ta e unico pilar economico di nos pais.

Nos vision, maneho y strategia tabata pa recupera e industria, yega na e nivelnan di 2019 y hasta surpasa esaki.

E mandatario a splica cu a uza 2019 como aña base pa haci comparacion, pasobra esaki tabata e miho aña den nos historia di turismo, unda tur indicador a comproba esaki: cantidad di turismo di repeticion, cantidad di bishitantenan crusero, ocupacion di camber, revpar, tourism recipe cu ta midi e cantidad di placa cu turistanan ta laga na Aruba, etc.

E mandatario ta corda cu na Januari 2022 Aruba tabata den pleno pandemia ainda, unda e variante Omicron, tabata registrando 5 mil caso positivo, y no obstante esey, gobierno a demostra curashi y determinacion pa traha un strategia di salida, pa sali for di e pandemia.

Minister di turismo a subraya cu awo por mira bek, cu e strategia di salida ta parti di e exito di e recuperacion di Aruba su turismo, pasobra e bishitantenan a sinti nan mes mas safe, pa a sali for di e pandemia, y sigur cu tur e protocolnan cu tabata tin, cu por a biaha pa Aruba.

Aruba ta un di e poco destinacionnan cu a keda habri desde Juli 2020, cu a habri nos fronteranan bek y na Januari 2022 mes, mientras cu hopi pais tabata lockdown Aruba a enfoca riba recuperacion di su turismo.

“IMF tambe a señala esaki den e rapport cu el a publica algun tempo atras cu ‘Aruba a actua y a move hopi lihe for di e pandemia’. Nos por comproba esaki cu nos estrategia di salida, cu nos a enfoca totalmente riba recupera nos turismo y nos economia”, e dignatario a reitera.

E mandatario a señala cu Aruba no a habri asina bon pa turismo na Januari, debi na e casonan di Omicron, pero si nos mira bek e prome seis lunanan di aña 2022 en comparacion cu 2019, mi ta kere cu nos na Aruba mester ta hopi satisfecho y gradici cu e performance di turismo.