Conseho pa no duna Serlimar placa por a causa ciere di e compania

The content originally appeared on: Diario

Minister Xiomara Maduro: — * Gobierno tin e obligacion di recoge sushi y tambe despues pa procesa esaki

ORANJESTAD(AAN): CAft un tempo pasa a manda 13 punto di conseho pa Gobierno, pa locual ta e situacion financiero di nos isla y Diahuebs durante un conferencia di prensa minister di Finanzas Xiomara Maduro a repasa e puntonan y a duna su reaccion.

Un di e puntonan di conseho di CAft ta pa baha gasto di producto di servicio cu 39 miyon florin.

“Den debatenan publico tabata wordo bisa cu Gobierno ta hisa e ‘goederen en diensten’ y no ta cumpli cu locual CAft ta bisa, pero relaciona cu esaki tin 3 carta caba cu a bay den direccion di CAft, caminda cu a splica riba e situacion akinan”.

Tabata kier pa pone e gastonan conforme 2020, siendo cu 2020 tabata un aña di pandemia, un aña excepcional, un aña caminda cu gobernacion pa un gran parti a sufri di e shelter in place.

Esaki ta nifica cu tin cierto gasto cu no a wordo haci, pasobra por ehempel no tabata tin hende na oficina, segun Maduro.

El a sigui bisa cu Gobierno a sigui si e  recomendacionnan di CAft pasobra dos biaha a haci cambionan den e presupuesto.

“Nos tin pensa di busca si conseho di un oficina  independiente pa asina haya un bista riba locual ta e gastonan di servicio y producto na pais Aruba, pa por haci un comparacion cu paisnan den Reino y tambe cu paisnan pafo di Reino cu ta similar cu pais Aruba”, segun e mandatario.

Un otro punto di conseho di CAft tabata pa obliga Serlimar pa drecha e asunto di cobranza y pa no duna Serlimar pa e deficitnan cu e compania tin.

“Tur hende por dunabo un conseho pa no duna Serlimar placa, pero si bo haci esey e lugar ta dal cera”.

Si e lugar bati bancarota hende lo ta riba caya y mas importante ta cu Gobierno tin e obligacion di recoge sushi y tambe despues pa procesa esaki.

Cosnan no ta bay asina, pues a pone fondonan disponibel pero a keda den e reglanan si di disciplina pa ora cu bo ta traha cu bo presupuesto, segun Maduro.

El a indica cu na 2019 ya caba CAft a duna recomendacionnan pa loke ta Serlimar y Gobierno a cumpli y a tene esakinan den consideracion.

Asina e mandatario a sigui repasa e diferente puntonan di sugerencia y conseho di CAft y a duna e splicacion riba locual Gobierno a haci caba pa cumpli cu esakinan.