Conocido periodista y locutor Angel Coronel a fayece

The content originally appeared on: Diario

Media di Aruba na luto

ORANJESTAD (AAN): E tabatin algun tempo ta batayando un malesa, y aunke el a lucha fuerte contra dje, riba Diaranson merdia a drenta e tristo noticia cu e conocido personahe den prensa na Aruba, esta Angel Coronel a fayece.

   Angel Coronel ta un persona kende desde final di decada di 1970 caba tabata popular den oranan di merdia, ora cu e tabata presenta e noticiero di merdia di emisora Voz di Aruba na 1320 AM.  Ademas di locutor, e tabata riba caya pa haci entrevista y atende conferencia.  Su voz tabata uno cu publico a costumbra rapidamente cune.  Ainda por corda con tempo di e confrontacionnan di Augustus Scur di 1977, ora cu Riot Commando a presenta y situacion a bira tenso, con Angel Coronel a dicidi yena e parti dilanti di su camisa cu monton di “buki diki”, pa asina crea un Bullet-Proof Vest crioyo, y e por a sigui raporta loke ta pasando.

   E tabata cana semper cu un tape-recorder pa asina documenta loke por socede, y tabata semper haci preguntanan critico na gobernantenan.  Cu e unidad mobil di Voz di Aruba, nan tabata transmiti hopi evento en bibo di cualkier skina di e isla.

   Despues di Voz di Aruba, el a cuminsa presenta noticia tambe na e emisora nobo, Radio Carina FM na 97.9 MHz unda cu su noticieronan di merdia a sigui haya bon recepcion cerca publico.  E tempo ey cu e inovacion di e director di e emisora ey, e epoca ey prome cu Telefon Celular a yega, nan a hasta busca un Wireless Phone cu por transmiti di basta leu.  Angel Coronel tabata cana tur caminda cune, y cualkier suceso riba caya, e tabata usa esaki pa bay en vivo.

   Pesey mes na fin di October 1985, aunke Angel Coronel tabata riba un Yate e momento ey pasando riba lama pazuid di Bushiri Beach Resort, el a mira huma preto di leu, y asina el a bira e prome periodista cu a transmiti y raporta cu Certified Groceries ta na candela.  E candela aki despues a plama y a destrui Club Visage, Codemsa, y henter Certified Groceries.

   Angel Coronel no a keda djis den mundo di radiodifusion, el a coopera tambe cu e mundo di TV, y tabata balioso cu su input na Tele Aruba. Como cu e ta un visionario, despues el a adkiri camera profesional di video, pa asina a graba y presenta un programa dirigi riba Turismo di Aruba.  Esey ta un sector cu el a keda enfoca hopi riba dje.  E tabata haci promocion pa Bonaire, y raporta sucesonan di e isla di Flamingo regularmente.

   Pa hopi colega, nan admiracion pa Angel Coronel ta grandi como cu su conocemento general ta basta extenso, y esaki tabata yude pa “traduci” detayenan complica den un Papiamento facil cu su oyentenan por compronde.

   Angel Coronel a keda activo den suministra informacion, hasta ora e tabata sufriendo di su malesa riba cama.  E ta demostra cu su su amor pa ta un fuente di informacion, a keda cune te na final.

   Angel Merix Coronel a nace na Aruba dia 31 di Mei 1950, pues a fayece cu 74 aña di edad.  Na su señora, yiu-, nietonan, y demas famia, DIARIO ta manda su mas profundo palabra di condolencia.