Confrontacion petroleo y clima a rementa na Dubai!

The content originally appeared on: Diario

DIARIO a prepara Aruba pa desaroyo mundial historico pa cera 2023


Caida total prijs di petroleo mundial basa riba miedo pa recesion.
Base financiero solido di Aruba den economia mundial 2024 alarmante 

ORANJESTAD (AAN)- Cu 2023 lo por a bira entrada pa un 2024 sumamente dificil na nivel mundial, tabata e advertencia grandi cu DIARIO na un forma continuo a presenta na Aruba.

   Tabata a base di vigilancia di desaroyonan mundial cu DIARIO a indica, cu e maneho financiero di Aruba dor di Gobierno Evelyn Wever-Croes hancra den e logro di un saldo financiero favorabel pa e pais, lo bira un factor determinante pa e forsa Arubano pa confronta desaroyonan mundial.

   Mientras November 2023 tabata yega na su fin, DIARIO a bati alarma pa e realidad cu mundo lo a enfrenta na e Conferencia di clima na Dubai, caminda hende lo mester a dicidi pa economia of hamber.

  Ta exactamente e palabranan aki “clima of hamber”tabata resona ayera ora historia a wordo skirbi na e momento, cu mester a prolonga e conferencia internacional pa atende cu cambio di clima pasobra mundo no por a yega na un acuerdo con ta actua na fabor di clima como condicion pa bida humano contra petroleo.

   E confrontacion di e dos interesnan a bira e apel di discordia na e Conferencia di Clima, cu mester a worde alarga cu un dia, mientras tabata trata na yega na un formula den cual ta atende cu e peliger cu petroleo ta causa pa hende, pero na mes momento ta tene na consideracion cu sin petroleo, economia di hopi pais chikito lo no por ta instrumento pa pone cuminda riba mesa.

   Mundo no por a yega na un acuerdo prome cu e final di e congreso na Dubai, loke a haci cu mester a alarga e encuentronan cu un dia mientras tabata trata na yega na un documento nobo den cual lo a atende cu e forma cu ta despedi di e epoca di petroleo.

   Un documento mester a wordo produci pa awe, mientras na nivel mundial publico tabata ricibi e informacion cu prijs di petroleo a baha drasticamente y na Aruba tambe tabata tin hubilo pa e forma cu prijs di gasolin a baha, manera DIARIO algun luna pasa ora e prijs internacional di petroleo tabata indica cu pa fin di 2023, prijs di petroleo lo a baha.

   Diamars prijs di petroleo a sigui baha pa miedo di problemanan economico y hasta un recesion na Merca, mientras situacion serio a presenta su mes na e conferencia di clima na Dubai.

   Paisnan grandi, manera Reino Hulandes mes, no tabata tras di ningun acuerdo riba clima, si no tabata tin accion contra e forma cu petroleo ta afecta clima.

A wordo exigi pa awe tin un documento den cual atencion pa e peliger di petroleo y paso contra e peliger aki, ta wordo atende.

   Na mes momento pregunta mester a wordo contesta kico lo pasa na paisnan chikito, cu no a cambia di rumbo manera a pasa na Aruba, cu a habri porta pa formanan nobo di combustibel pa reemplasa petroleo.

   Paisnan chikito, den Caribe mes tambe, cu a habri porta pa petroleo como solucion economico, ta enfrenta problema economico y social grandi si mester pone fin na industria petrolero.

   DIARIO te na momento di bay imprenta ayera, tabata den contacto cu expertonan economico mundial, cu ta sumamente preocupa pa e perspectivanan mundial pa 2024 y ta sostene loke ya instancianan internacional manera IMF a trece dilanti pa loke ta trata economia na 2024.

   “Mundo ta confronta un pakete sumamente serio di problema,”informantenan a trece dilanti. E caminda mundial pa 2024 conoce un grado enorme di tension, cu sigur a aumenta na e conferencia di clima cu a crea espectativanan enorme,”a bini dilanti.

Aruba mester ta bon prepara pa e realidad mundial, informantenan ta sigui adverti. E forma cu Aruba a atende cu su basenan financiero y economico den e ultimo añanan ta sumamente importante.

E desaroyonan na e Conferencia di Clima, cu mester wordo considera como un fracaso cu mester a remedia, ta segun informantenan ehempel di e situacion mundial peligroso pa su falta enorme di stabilidad y presentacion di realidad.

“E encuentro tabata parce un union mundial den cual tabata tin lugar pa homber, muher, mucha pero e aspecto principal kico ta bay haci cu e peligernan pa clima y asina bienestar di hende, a bay perdi di tal forma cu mester a alarga e cumbre pa trata na yega na un acuerdo mundial den cual mester dicidi entre petroleo y clima,” informantenan clave a mustra.