Computer a faya na St. Maarten atrobe y consumidornan a ricibi cobranza exorbitante pa coriente

The content originally appeared on: Diario

Habitante haya cobranza di riba mey miyon Florin

ORANJESTAD (AAN): Informacion procedente di St. Maarten ta indica cu e compania di electricidad, NV GEBE tin keto bay dolor di cabez cu su sistema di computer.

   Manera ta conoci, na luna di Maart 2022 e compania su computernan di administracion a sufri un atake cibernetico cu a laga e departamento aki plat pa mas di 2 luna largo.

   Pero awor nan tey bek, y a indica na publico cu nan ta bay haya 3 cobranza pareu pa bay paga.

   Algun consumidor a haya nan cobranza na cas via post y tambe email, y a keda babuca pa mira e suma cu a aparece riba e papel.  Esey ta loke e corant The Daily Herald a mustra den su edicion e siman aki.

   Aki mes por mira un cobranza cu un ciudadano a ricibi pa bay paga, esta di riba di mey miyon Florin.  E corant a publica e cobranza, cu ta indica cu e invoice ey ta pa e suma di 531.607 Florin.

   Diferente cliente cu a casi cay flauw ora di mira e suma grandi ey pa bay paga, a core yama reclama e compania NV GEBE.

   A bin sali na cla, cu e cobranzanan cu a wordo manda via email a sufri di un problema tecnico durante e fase di prueba.  Esey ta loke e compania GEBE a bisa awor den un boletin.

   “Resultado di esey ta cu un cobranza grandi a wordo manda ekibocadamente cu a cubri e 12 lunanan anterior, esta di Februari 2021 pa Maart 2022, y di Maart 2021 pa Februari 2022.”

   NV GEBE awor ta pidi publico pa deshaci di e cobranza grandi aki.  Pero nan ta bisa cu e otro dos cobranzanan cu ta pa luna di Maart 2022 y April 2022 si ta corecto.