Compania Arupro ta ampliando y ta trahando riba proyecto nobo pa converti plastico den Diesel fuel

The content originally appeared on: Diario

ORANJESTAD (AAN): Pariba di Brug ta bay haya un fabrica nobo mas!  Esey ta loke Andres Hernandez di e compania Arupro a confirma recien na DIARIO.

   Hernandez a corda con na aña 2019, e compania a habri un sucursal cu a yama ‘Arupro Chemicals’ cu tambe ta Pariba di Brug, y su meta tabata pa colecta tur tipo di material cu por wordo recicla, esta boter, bleki, plastico, etc., pa asina bay procesa nan.

   Den e proyecto ey a yega na e situacion cu a habri un ‘Plastic Recycle Center” unda tur plastico na Aruba lo bay wordo procesa.  E ora a dicidi pa cuminza piki tur plastico, y tambe puntra clientenan pa trece plastico na un forma liber.  DIARIO a yega di raporta riba esey unda por mira hopi hende ta hiba plastico lora den saco of den caha, y ta haya placa pa nan.

   Arupro a cuminza paga pa empakenan, y den etiketa di reciclahe ta poni riba nan, ta cuanto nan ta paga pa cada uno. Tur otro plastico ta pagando 10 cent pa kilo.  El a yega dado momento asina hopi cu no tin espacio pa warda nan.  Pues e planta di reciclahe di plastico mester haya lugar mas grandi!

   Segun Hernandez, e compania a acerca Gobierno na 2021 cu a pidi pa haya un lugar. Y bisa cu nan lo haya un lugar si ta serio den den e proceso di reciclahe.  Gobierno a priminti hunto cu DIP pa haya un espacio na posiblemente Barcadera pa traha edificio.  Aunke na opinion di Hernandez, e zona na Barcadera ta hopi leu pa nan operacion cu ta enfocando den e zona na San Nicolas.

   Nan bista a bay riba un edificio cu tabata deteriorando den nan caya, unda nan ta mira muchanan tur atardi ta hunga den dje cu bala, pero e lugar ta yen di asbesto.  Finalmente a yega na na un areglo cu e compania JEM Industrial Services, y Omni Real Estate di famia Mansur, y a haya e espacio grandi ey.   E compania Arupro mes a core haci e edificio limpi, elimina tur peligro, y ya caba e bultonan di plastico cu nan tabatin ta acumula den otro warehouse, a wordo manda pa ey pa e warehouse nobo.

   Converti plastico den Diesel fuel:  Despues cu ciencia a traha mas di 20 aña riba dje, porfin ya caba diferente planta a habri rond mundo, unda nan ta converti plastico desechable den Diesel fuel di grado 1, cu ta kima limpi.  E proceso ta usa tecnologia di temperatura halto, yama ‘Thermalysis’, pa converti plastico den Diesel.

   Segun Andres Hernandez, Arupro tin tres proyecto grandi pa reciclahe, di cual tur lo bay eynan den e sede nobo.  Uno di e proyecto ey lo ta di Thermalysis, unda lo converti plastico den ‘Diesel’.

   Esey lo ta e prome paso, y un di e ‘sub-productonan’ cu e proceso ey ta produci, esta un quimico cu lo bay bira ingrediente principal di un producto nobo cu Arupro lo bay cuminza fabrica, distribui, y bende den e region.  Ta trata di un producto di ‘Tire-Shine’, cu ta uno cu ta yuda tirenan di auto briya, despues cu bo a caba di laba bo auto of vehiculo.

   Ademas di esey, Hernandez a mustra cu hopi di e envasenan di plastico cu nan ta ricibi, ta haya un bon laba, y ta wordo ‘re-usa’ pa bolbe pone producto den dje.  Pues e boter di un galon ey, ta haya un bida mas na Aruba, prome cu e wordo destrui.

   Djis corda cu cada luna, e compania Arupro ta yena como 5.000 boter di galon cada luna cu producto.  Esey nifica cu tin 5.000 boter cu si acaso nan por wordo re-usa, esey nifica cu ta hopi boter ta haya bida nobo, y no mester bay finaliza den un landfill.

   Hernandez a splica cu tur otro plastico ta wordo acepta den e planta di procesamento aki, unda ta selecta nan y reconverti nan.