Comerciantenan Uni Aruba ta feliz cu Aduana awor si ta acepta ora bo cumpra algo cu descuento den exterior

The content originally appeared on: Diario

Frans Ponson

ORANJESTAD (AAN): Manera cu DIARIO a trece dilanti caba na comienzo di luna di Augustus 2022, e grupo local di ‘Comerciantenan Uni Aruba’ (CUA) durante un conferencia di prensa, a trece dilanti un preocupacion cu nan tin encuanto e sistema di fracturacion di Aduana di Aruba, unda cu ora bo cumpra algo cu tin descuento riba dje, e instancia local ora di importacion “no ta acepta e descuento” ey.

   Frans Ponson, Presidente di CUA a splica cu nan a haya hopi keho di comercio cu esaki ta socede masha hopi mes.  Pesey a expresa nan preocupacion pa cu e forma cu ta cobra Impuesto di Importacion, incluyendo e hecho cu ta hasta cobra e impuesto aki riba e prijs di shipping, y tambe e famoso “douanewaarde”, cu ta un ley unda cu nan por pone nan prijs desea.

   E kehonan aki a haya oido!  Pasobra Aduana Aruba a percura pa yama un reunion cu Comerciantenan Uni Aruba pa papia riba e asunto.

   Frans Ponson di CUA, a indica cu e reunion a bay basta bon.  “Nan a nan trece nan punto pakico nan no por acepta e prijs di descuento, pasobra leynan ta anticua,” Ponson a bisa encuanto reaccion di Aduana.

   Di nan banda, Comerciantenan a trece nan puntonan hunto cu expertonan huridico, pa mustra pakico e prijs di descuentonan aki for di exterior mester wordo acepta awendia.

   Ponson a considera e reunion como uno exitoso.  Na final Aduana a indica cu nan lo bay bek sinta cu nan grupo, y nan a sali dilanti bisa cu entrante awor, nan ta cuminza acepta e prijsnan di descuento cu e importadornan di Aruba de vez en cuando ta haya di e agencianan internacional.

   E president di Comerciantenan Uni Aruba a splica cu nan grupo ta uno hopi critico, y ora cu nan ta notando algo cu no ta corecto, of cu tin hopi espacio pa coreccion, nan lo sali dilanti y bisa esey tambe.

   Awor cu Aduana Aruba a indica cu nan lo cuminza acepta esey, a pone Ponson y demas comerciantenan bira hopi contento.

   “Nos ta contento cu Comericantenan Uni a haya oido, y cu Aduana a sali dilanti cu nan lo bay acepta e descuento.  Nos ta bisando esey awor pa tur hende haya sa di esey.”

   “Si abo so ta haya un descuento, esey no ta valido.  Pero si riba Amazon, eBay, of cualkier portal di Internet ta tur hende ta haya e descuento, y bo por mustra cu bo credit card cu ta esey bo a paga, Aduana Aruba desde awor ta bay acepta e descuento ey, y esey nifica cu bo ta bay paga impuesto di importacion riba e prijs ey.”

   Ponson a sigui bisa: “Pues si pa Black Friday venidero, e TV di $400 bo a logra haye pa $300, e ora bo ta bay paga e impuesto di importacion riba esey awor.”

   Aki Frans Ponson a subraya, cu esaki ta un logro pa Comerciantenan Uni Aruba.  “Pero corda cu nos no ta bringa pa comercio so, sino pa henter e pais Aruba, como cu si pueblo tin menos placa den saco e ora comercio tambe ta haya menos.  Pues den e caso aki e ta un ganashi pa henter pueblo, pasobra aworaki nan ta bay resta mas placa debi cu ta paga menos na impuesto di importacion, y asina ta yuda e comerciantenan tambe.”

   Comerciantenan Uni Aruba awor ta duna danki na Gobierno cu a duna nan oido, y cu Aduana Aruba a caba di habri un relacion nobo cu bon contacto y cu na final a sali den un decision positivo.  “Pesey nos ta bin dilanti tambe y gradici, ora Gobierno ta haci algo cu ta beneficia tur hende,” Ponson a bisa.