Comerciantenan Uni Aruba awor si kier pa elimina tur medida di Covid-19

The content originally appeared on: Diario

Wever-Croes: Ta riba agenda di Crisis Team pa des-escala medidanan -ORANJESTAD (AAN): Un video cu Comerciantenan Uni Aruba a pone Dialuna riba nan social media, a mustra cu e momento a yega pa Gobierno elimina tur medida cu tin ainda na vigor pa mitiga e brote di Coronavirus na Aruba.

   Esey ta loke Frans Ponson di Comerciantenan Uni a declara.  El a bisa esey despues cu tur hende por a mira con hendenan a aglomera durante eleccion y paradanan cu a pasa den fin di siman.

   “Si no tin handhaving mas, no tin ningun base mas pa e papel aki,” Ponson a bisa.  E ta referi na e papel cu ta indica cual medida ta valido aworaki ainda pa mitiga brote di Coronavirus.

   Con por bisa esnan na Restaurant cu tin maximo di tanto hende na mesa.  Ki base legal Gobierno por tin pa pone un plafond na cantidad di hende sinta na mesa, siendo cu tabatin trailer cu bebemento y yen hende aglomerando.

   “Nos no tin ningun problema pa tin fiesta rond di Aruba, nos ta contento cu nan ta celebra.  E problema cu comerciantenan tin atrobe, ta ‘hancho pa uno’ y ‘smal pa otro’.  No por tin comerciantenan cu tin negoshi cera y tin di cumpli cu e.o. ley seco.

   “Pesey comerciantenan ta practicamente bisando Gobierno, cu desde awe nan tin di sali y kita tur e medidanan aki inmediatamnete pasobra no tin ningun base legal mas pa cera un Snacktruck banda di caminda pa 11:00 pm y bisa e persona cu e no por bende hamburger,” Ponson a bisa.

   Dialuna atardi, despues di su reunion cu Gobernador Boekhoudt, Evelyn Wever-Croes a bisa prensa cu e no tabata sa di e declaracion aki di comercio, pero locual e por bisa si ta cu e eliminacion di medidanan ta algo cu ta riba agenda di Crisis Team pa sigui flexibilisa e medidanan.

  El a agrega cu a wanta un rato pasobra tabata sa cu eleccion no tur ora por wanta e emocionnan. Awor cu eleccion a pasa ta continua cu e trabao den Crisis Team pa sigui des-escala tur e medidanan cu tin y yega cierto momento na un normalidad bek.