Colegio EPI tin como meta un total di 572 studiante nobo pa e school-jaar 2022-2023

The content originally appeared on: Diario

Ryan Maduro, Director General: —*Te cu dialuna, 590 a registra

ORANJESTAD (AAN):   Director General di Colegio EPI, Ryan Maduro, a duna di conoce den conferencia di prensa c’un di e ehercicionan cu nan a haci ta pidi tur e scolnan MAVO na Aruba pa un inventarisacion pa sa exactamente di cuanto studiante lo por no haya un oportunidad pa drenta den e opleidingnan.

E inventarisacion a trece dilanti cu pa Apothekerassistent ta 5 studiante, pa Bouwkunde ta 31 studiante y pa Werktuigbouwkunde ta 13 studiante. Di e lista aki no sa ainda cuanto ta gradua y esey kiermen cu e por baha, Maduro a señala.

Normalmente EPI ta tuma 70% di e studiantenan cu ta bisa cu kier bay e opleiding, pero nan no ta sigur si nan ta gradua ainda. E resultado final ta hopi biaha pa e grupo ey 70% di esnan cu ta slaag.

Cu e regla cu mester tin minimo 10 persona den un grupo, esey ta nifica cu Apothekerassistent no por habri, Bouwkunde ta un opleiding cu si tin binti y tanto studiante cu lo por habri un grupo y Werktuigbouwkunde tambe, si ta aplica e 70% ta un grupo cu no por habri, a señala.

Pa loke ta trata 2022-2023, e proceso di inscripcion a habri for di 1 di Mei y ta importante pa e studiantenan cu ta interesa pa bay EPI na un di e 13 opleidingnan cu nan ta ofrece pa bay riba nan website pa haya tur informacion.

Pa e 8 opleidingnan nobo, no tin un exigencianan fuerte pa por ingresa. E unico exigencia ta cu mester tin un diploma. Esey kiermen cu ta haci’e flexibel pa e studiantenan cu kisas no tin e profil pa ‘fit’ den e opleiding, cu toch por haya un chens pa drenta, Ryan Maduro a splica.

E fecha cu EPI ta cera e inscripcion ta dia 15 di Juni proximo y na momento cu cera esaki ta bay tin un bista completo di tur esnan cu a inscribi y basa riba esaki, lo bay bek na mesa cu Directie Onderwijs, DPS, Inspectie pa determina si mester haci cambio of kico otro mester haci pa acomoda e studiantenan pa drenta EPI, e director a expresa.

Te cu dialuna 23 di Mei, tin 590 studiante cu a registra pa bay na un di e opleidingnan na EPI, pero di e 590 aki, 218 a paga e suma di inscripcion. Tanten cu e studiante no paga e proceso di evaluacion no ta cuminsa, a enfatisa.

E meta di EPI ta 572 studiante y tin 218 studiante di cual 77 a pasa ful e proceso di evaluacion caba y ta cuminsa na school-jaar 22/23 como studiantenan nobo. Tin dos siman mas pa bay, Ryan Maduro a declara.